Nashik News : आर्द्रा नक्षत्रामध्ये जिल्ह्याच्या पश्चिम पट्ट्यात पावसाने जोरदार हजेरी लावली. त्यामुळे या भागात शेतीकामांना गती आली आहे. मात्र पूर्व भागात अद्यापही समाधानकारक पाऊस झालेला नाही. त्यातच सोमवारी (ता.३) व मंगळवारी (ता.४) सलग दोन दिवस पावसाने उघडी दिली.

अशातच मंगळवार (ता.४) नंतर मालेगाव व देवळा तालुक्यात पावसाने दमदार हजेरी लावली. तर इतर तालुक्यात हलका पाऊस झाला. त्यामुळे काहीसा दिलासा मिळाला आहे. बुधवारी (ता. ५) देवळा तालुक्यात पावसाने हजेरी लावली.

कसमादे मालेगाव, देवळा तालुक्यातील पावसाचा जोर दिसून आला. अनेक ठिकाणी शिवारात पाणी साचले. मात्र समाधानकारक पाऊस अद्याप नसल्याची स्थिती आहे. मालेगाव तालुक्यातील निमगाव, कौळाणे, करंजगव्हाण, वडनेर, कळवाडी महसूल मंडळात माध्यम पाऊस झाला.

तर मालेगाव शहर परिसरात हलका पाऊस झाला. देवळा तालुक्यातील उमराणे महसूल मंडळात पावसाचा जोर दिसून आला. तर देवळा मंडळात मध्यम, तर लोहनेर मंडळात हलका पाऊस झाला.

नांदगाव तालुक्यातील नांदगाव, वेहेळगाव, हिसवळ महसूल मंडळात मध्यम, मनमाड व जातेगाव महसूल मंडळात हलका, तर येवला तालुक्यातील आंदरसूल महसूल मंडळात माध्यम, नगरसुल, पाटोदा, सावरगाव, जळगाव महसूल मंडळात हलका पाऊस झाला.

पश्चिम पट्ट्यात जोर कमी

पेठ तालुक्यात पावसाने उघडीप झाली. तर सुरगाणा तालुक्यातील बोरगाव महसूल मंडळात हलक्या सरी बरसल्या. तर तालुक्यात पावसाचा हलकासा शिडकावा झाला. नाशिक, दिंडोरी, कळवण, इगतपुरी, त्र्यंबकेश्वर, निफाड, सिन्नर, चांदवड तालुक्यात हलका पाऊस आहे.

पेरणीयोग्य पावसाची गरज

जिल्ह्यात पेरणी योग्य पाऊस पडलेल्या पश्चिम घाट विभाग, इगतपुरी, पेठ, दिंडोरी, सुरगाणा, त्र्यंबकेश्वर, कळवण या भागात कापूस, सोयाबीन, तूर, मूग आदी खरीप पिकाची पेरणी सुरु ठेवावी. तसेच पूर्वेकडील अवर्षण प्रवण व मैदानी विभाग जसे सिन्नर, येवला, नांदगाव,मालेगाव, चांदवड, नाशिक व निफाड तालुक्यात खरीप पिकांची पेरणी ७५ ते १०० मिमी पाऊस झाल्यानंतरच करावी, असा सल्ला महात्मा फुले कृषी विद्यापीठाच्या कृषी हवामान केंद्रातर्फे देण्यात आला आहे.