परभणी ः माथाडी मंडळाची कामगार विरोधी धोरणे तसेच गृहमंत्री देवेंद्र फडणवीस (Devendra Fadnavis) यांच्या हमाल कामगार विरोधी भूमिकेच्या निषेधार्थ बुधवारी (ता.१८) परभणी येथील माथाडी मंडळावर मराठवाडा हमाल- माथाडी मजदूर युनियन (लाल बावटा) तर्फे मोर्चा (Hamal Morcha) काढण्यात आला.

गृहमंत्री व महसूल मंत्री यांच्या कामगार विरोधी वक्तव्याचा निषेध करावा, याबद्दल शासनाच्या कामगार विभागाने तत्काळ स्पष्टीकरण द्यावे, सर्व नोंदणीकृत कामगारांना फंडाची पासबुके तत्काळ अदा करावीत, दरमहा हिशोबाची तरतूद करा, दरमहा वेतन वेळेवर अदा करावे.

दरमहा १० तारखेपूर्वी वेतन अदा करावे, परभणी जिल्ह्याच्या सर्व कृषी उत्पन्न बाजार समित्या, वखार महामंडळे, जिंनिग, साखर कारखाने, नाफेड खरेदी केंद्रे, हमीभाव खरेदी केंद्रे, गुड्स शेड, खासगी गोदामे येथे माथाडी कायद्याची कठोर अंमलबजावणी करावी.

हमाल माथाडी कायद्याच्या तरतुदीनुसार माथाडी प्रा फंड नियमात बदल करावा. माथाडी मंडळाच्या लेव्हीमध्ये वाढ करून ४० टक्के करावा आदी मागण्या या वेळी करण्यात आल्या.

युनियनचे अध्यक्ष कॉ. शेख अब्दुल, सरचिटणीस कॉ. राजन क्षीरसागर यांच्या नेतृत्वात हा मोर्चा काढण्यात आला.