Nashi News नाशिक : जिल्ह्यात वादळी वाऱ्यासह झालेल्या पावसामुळे (Unseasonal Rain) नुकसान झालेल्या (Crop Damage) भागाचे तातडीने पंचनामे (Crop Damage Survey) करण्यात यावे, अशा सूचना पालकमंत्री दादाजी भुसे (Dada Bhuse) यांनी संबंधित अधिकाऱ्यांना दिल्या.

निफाड तालुक्यात अवकाळी पावसामुळे बाधित झालेल्या चांदोरी येथील शेतीची पाहणी शुक्रवारी (ता. १०) भुसे यांनी केली. त्या वेळी ते बोलत होते. या वेळी जिल्हा अधीक्षक कृषी अधिकारी विवेक सोनवणे, प्रांताधिकारी डॉ. अर्चना पठारे यांच्यासह शेतकरी व ग्रामस्थ उपस्थित होते.

भुसे म्हणाले, की अवकाळी पावसाने शेतीचे मोठ्या प्रमाणात नुकसान झाले आहे. नुकसानग्रस्त शेतीचे पंचनामे वेळेत पूर्ण करण्यात येतील. कोणताही बाधित शेतकरी मदतीपासून वंचित राहणार नाही, याबाबत कृषी विभागाने खबरदारी घ्यावी.

शासन नुकसानग्रस्त शेतकऱ्यांच्या पाठीशी आहे, असेही भुसे यांनी सांगितले. निफाड तालुक्यातील चांदोरी येथील बाळासाहेब हिंगोले, गणपत हिंगोले यांच्या द्राक्ष बागांची व बाळासाहेब घोरपडे यांच्या गव्हाच्या शेतीची पाहणी केली.