Pune News : केंद्रीय वाणिज्य मंत्रालयाने कांदाप्रश्‍नी बोलाविलेल्या बैठकीस उपस्थित राहण्यासाठी महाराष्ट्रातून एकही जबाबदार मंत्री आणि नेते गेले नाहीत. यामुळे कांदा प्रश्‍नाकडे पाहण्याचा राज्य शासनाचा दृष्टिकोन अतिशय उदासीन आणि असंवेदनशील आहे, असा आरोप खासदार सुप्रिया सुळे यांनी केला आहे.

केंद्रीय वाणिज्यमंत्री पीयूष गोयल आणि राज्याच्या मुख्यमंत्र्यांना टॅग करत सुळे यांनी याबाबत ट्विट केले असून, कांदा उत्पादक शेतकरी, व्यापारी यांच्यासाठी ही बैठक अतिशय महत्त्वाची असल्याचे म्हटले आहे.

या बैठकीसाठी महाराष्ट्रातील प्रमुख कांदा उत्पादक शेतकरी, स्थानिक लोकप्रतिनिधी आणि राज्यातील प्रमुख मंत्री यांना बैठकीसाठी आमंत्रित केले की नाही याचे उत्तर राज्य सरकारने देणे आवश्यक आहे, असा प्रश्‍नही त्यांनी उपस्थित केला आहे.

वास्तविक केंद्र शासनाच्या असंवेदनशील धोरणामुळे कांदा उत्पादक शेतकरी अडचणीत आले आहेत. या पार्श्‍वभूमीवर राज्यातील कांदा उत्पादकांची बाजू केंद्र सरकारसमोर मांडण्यासाठी महाराष्ट्रातील जबाबदार मंत्र्यांनी या बैठकीला जाणे आवश्यक होते.

परंतु बैठकीला त्यांची उपस्थित नसणे यावरून राज्य सरकार शेतकऱ्यांप्रती किती असंवेदनशील आहे, हे दिसून येते, असा आरोपही सुळे यांनी केला आहे. बैठकीला आमंत्रित करूनही बैठकीला गेले नाहीत, यावरून या बैठकीकडे राज्य शासनाचा पाहण्याचा दृष्टिकोन अतिशय उदासीन आणि असंवेदनशील आहे हे स्पष्ट आहे, असे त्यांनी म्हटले आहे.