Nagar News : राज्यातील जिल्ह्यांतील २९७ महसूल मंडलांमध्ये पावसाचा २१ दिवसांपेक्षा जास्त खंड पडलेला आहे. यामध्ये कर्जत-जामखेड मतदारसंघाचाही समावेश असून, शेतकऱ्यांचे अतोनात नुकसान होत आहे.

येथील शेतकऱ्यांनी तूर, कापूस, मका, बाजरी, उडीद, मूग, सोयाबीन या पिकांसाठी विमा संरक्षण घेतले असून, पंतप्रधान पीकविमा योजनेअंतर्गत हंगामातील प्रतिकूल परिस्थितीबाबत अधिसूचित महसूल मंडलांमध्ये ७ वर्षांच्या सरासरी उत्पन्नाच्या तुलनेत ५० टक्के घट आहे. त्यामुळे शासनाने पीक विम्यातील २५ टक्के अग्रिम शेतकऱ्यांना तातडीने द्यावे, अशी मागणी आमदार रोहित पवार यांनी केली आहे.

रोहित पवार यांनी सांगितले, की कर्जत-जामखेड मतदार संघामध्ये यंदाच्या वर्षी सरासरी पावसापेक्षा कमी पाऊस झाला आहे. पाऊस नसल्यामुळे पाण्याची टंचाई जाणवत आहे. त्यामुळे शेतकऱ्यांची उभी पिके जळत आहेत. याशिवाय पशुधनही पाणी व चाऱ्याअभावी ग्रस्त आहे. हे पशुधन जगविण्यासाठी चारा छावण्यांची गरज आहे.

पशुधन आणि नागरिकांनाही पिण्यासाठी पाण्याची टंचाई जाणवत असल्याने पाण्याचे टँकरही चालू करण्याची गरज आहे. याबाबत त्यांनी पालकमंत्री राधाकृष्ण विखे यांनाही निवेदन दिले आहे.