Pune News : अधिकाधिक शेतकऱ्यांनी पीकविमा योजनेत सहभागी होण्यासाठी शेतकऱ्यांना अवजारे बक्षिस योजना जाहीर करण्यात आली आहे. यासाठी विठ्ठल जगताप यांनी पुढाकार घेतला आहे. यासाठी सिंगापूर गावात १ रुपयात पीकविमा अर्ज भरण्यासाठी मेळावा आयोजित करण्यात आला. भाग्यवान शेतकऱ्याला कुट्टी मशिन, फवारणी पंप व इतर शेतकऱ्यांना आकर्षक बक्षिसे देण्यात येतील.

मेळाव्याला तालुका कृषी अधिकारी सूरज जाधव प्रमुख पाहुणे म्हणून उपस्थित होते. शेतकऱ्यांचे झालेले आर्थिक नुकसान पंतप्रधान खरीप पीकविम्यामार्फत शेतकऱ्यांना मिळू शकते. शासनाने पीकविमा एक रुपयांमध्ये केला आहे. मात्र शेतकऱ्यांमध्ये पीकविम्याबाबतीत उदासीनता दिसून येत आहे.

त्यामुळे पंतप्रधान पीकविमा योजनेबाबत मोठ्या प्रमाणात शेतकऱ्यांमध्ये जनजागृती निर्माण करण्यासाठी जगताप यांनी पीकविमा भरणाऱ्या शेतकऱ्यांना ३० हजार रुपये किमतीची कुट्टी मशिन, फवारणी पंप व इतर शेतीउपयोगी साधने बक्षीस स्वरूपात ठेवली. परिणामी सिंगापूर, आंबळे येथील कांदा, बाजरी, भुईमूग उत्पादकांनी सहभाग घेत पीकविमा उतरविला.

तालुका कृषी अधिकारी सूरज जाधव यांनी पंतप्रधान पीकविमा शेतकऱ्यांना कसा लाभदायी आहे, या संदर्भात मार्गदर्शन केले. पीकविम्याबाबत जनजागृतीसाठी जगताप यांनी प्रयत्न केल्याबद्दल उपसरपंच सौरभ लवांडे यांनी त्यांचे आभार मानले. सिंगापूर गावातील प्रथम पीक विमा काढणारे शेतकरी शंकर लवांडे यांना पीकविमा भरलेली पोचपावती देण्यात आली.

सरपंच संगीता वारे, कृषी मंडल अधिकारी गणपत वाघमारे, कृषी पर्यवेक्षक सचिन जगताप, किरण हरपळे, उपसरपंच सौरभ लवांडे, विशाल लवांडे, विक्रांत पवार, पोलिस पाटील यादवेंद्र उरसळ, ग्रामसेवक उज्ज्वला हिंगणे, गोविंद शेतकरी सेवा केंद्राचे प्रमुख भूषण जगताप, अजिंक्य दरेकर उपस्थित होते.