Yavatmal News : कृषी विभागाच्या पथकाने राळेगाव मार्गावरून सहा लाख रुपये किमतीचे खत आणि कीटकनाशक जप्त केले होते. त्यानंतर निविष्ठांचे नमुने प्रयोगशाळेकडे पाठविण्यात आले. हे नमुने ‘फेल’ आल्याने या प्रकरणी चार जणांविरोधात गुन्हा दाखल करण्यात आला आहे.

नाशिक येथील गोल्डन अपॉर्च्युनिटी कंपनीच्या व्यवस्थापक मोनाली ठाकरे (वय २४, रा. नाशिक), विनोद ओंकार (रा. कळंब, यवतमाळ), नमो ऑर्गेनिक कंपनी नरखेड, गजानन ज्ञानेश्‍वर खेरडे यांच्याविरोधात गुन्हा दाखल करण्यात आला आहे.

अनधिकृत जागेत खताचा साठा करून विक्री करणे, राज्य व केंद्र शासनाने अधिकृत न केलेल्या खताच्या ग्रेडचे उत्पादन, नोंदणी प्रमाणपत्र न घेता खताची विक्री करणे, यातून शेतकरी आणि शासनाची फसवणूक करणे अशा कारणांवरून ही कारवाई करण्यात आली. कळंब तालुका कृषी अधिकारी शुभ्रकांत भगत यांनी तक्रार दाखल केली होती.

१६ जून रोजी एमएच १५ एफव्ही ३७३४ क्रमांकाच्या ट्रकमधून कळंब येथील गजानन खेरडे यांच्या मालकीच्या गोदामात निविष्ठांचा साठा विनोद ओंकार उतरवीत होते. त्यांच्याकडे या निविष्ठांविषयी चौकशी केली असता त्यांच्याकडे कोणतीच कागदपत्रे आढळून आली नव्हती. परिणामी, हा साठा जप्त करण्यात आला होता.