रोहा ः हवामान बदलाचा फटका आंबा उत्‍पादकांना (Mango Producer) बसण्याची शक्‍यता आहे. अद्याप मोहर (mango Blossom) न आल्यामुळे आंबा बागायतदार चिंतेत आहेत. २०२० मध्ये निसर्ग चक्रीवादळामुळे (Cyclone Nisarg) अनेक ठिकाणी आंब्‍याची झाडे उन्मळून पडल्‍याने बागायतदारांचे मोठे नुकसान झाले होते.

मात्र यातून जी झाडे वाचली, त्‍यांना अद्याप मोहोन आलेला नाही. ज्‍या झाडांना मोहर आला, तोही गळून पडल्‍याचे बागायतदार सांगतात.

रोहे तालुक्यातील सुतारवाडी, जामगाव, दुरटोली, ढोकलेवाडी, गौळवाडी (विजयनगर) कामथ, सावरवाडी, येरळ, कुडली, अंबिवली, नारायणगाव, तांबडी, वीरजोली इत्यादी ठिकाणी फार्महाऊस आहेत.

या फार्महाऊसच्या परिसरात जास्तीत जास्त आंब्याच्या झाडांची लागवड करण्यात आली आहे. मोहर न आल्यामुळे फार्म हाऊस मालकांनाही चिंता लागली आहे. या विभागातील आंबे मोठ्या प्रमाणावर परदेशात किंवा अन्य राज्‍यात विक्रीसाठी जातात.

मात्र यंदा अद्याप मोहर आल्‍याने उत्‍पादनावर परिणाम होण्याची शक्‍यता आहे. दोन वर्षेही चक्रीवादळामुळे आंबा उत्‍पादनावर परिणाम झाला होता. यंदा हवामान बदलामुळे नुकसान होण्याची धास्‍ती बागायतदारांना आहे.