Jalgaon News : भोकर-पळसोद-रामेश्वर (ता. जळगाव) हा तीन गावांना जोडणारा मार्ग मागील २० ते २२ दिवसांपासून चिखलामुळे बंदावस्थेत आहे. शेतकरी शेतात ट्रॅक्टर, दुचाकी घेऊन जाऊ शकत नाहीत. पायी जातानाही मोठा चिखल तुडवावा लागत आहे.

भोकर व परिसरत तापी नदीकाठी आहे. परिसरात काळी कसदार जमीन आहे. केळीची शेती अधिक असून, भोकरपासून साडेतीन किलोमीटर एवढा हा रस्ता आहे. पुढे तो पळसोद व रामेश्वर येथे जातो. हा रस्ता पूर्वी डांबरी होता. त्याची दैना झाली होती. त्याची दुरुस्ती, नूतनीकरण करण्यासंबंधी तो दोन्ही बाजूला जेसीबीच्या साह्याने खोदून माती रस्त्यावर माती टाकली आहे.

मुख्य रस्त्यावर मातीचा मोठा थर आला. त्याचा पावसामुळे पूर्ण चिखल झाला आहे. भोकर, आमोदे बुद्रुक, जामोद व पळसोद या गावांचा संपर्क आहे. या गावंचे मिळून सुमारे एक हजार हेक्टर क्षेत्र या भागात आहे. त्यात केळी पीक अधिक आहे. या गावांची मिळून सुमारे १२ हजारांवर लोकसंख्या आहे.

या रस्त्याने पुढे रामेश्वर मंदिर येथे भक्त, ग्रामस्थ जातात. तेथे गिरणा-अंजनी व तापी नदीचा त्रिवेणी संगम आहे. पुरातन महादेव मंदिर आहे. यामुळे हा मार्ग सोईस्कर आहे. मोठी ये-जा या रस्त्यावरून सुरू असते. हा रस्ता तयार करताना एकाच बाजूने खोदायला हवा होता. परंतु तो दोन्ही बाजूने खोदून त्याची माती रस्त्यावर टाकण्यात आली.

त्यात सतत किंवा मागील २२ ते २३ दिवस पाऊस सुरू आहे. पावसामुळे त्यावर मोठा चिखल झाला. चिखलातून ट्रॅक्टर, दुचाकी जाऊ शकत नाहीत. अनेक शेतकऱ्यांच्या दुचाकी रस्त्यात मध्यंतरी अडकल्या होत्या.

रिमझिम पावसाने शेतात तणनिंत्रण व इतर कामे रखडली आहेत. पावसाळ्यात रस्त्यांचे नूतनीकरण, विकास कसा केला जातो, रस्ता तयार करायचा होता तर उन्हाळ्यात केला असता, असा मुद्दा शेतकरी उपस्थित करीत आहेत.