परभणी ः ऑक्टोबर ते डिसेंबर २०२२ या कालावधीत मुदत संपणाऱ्या परभणी जिल्ह्यातील सर्व नऊ तालुक्यांतील १२८ ग्रामपंचायतींचा निवडणूक (Grampanchayat Election) कार्यक्रम राज्य निवडणूक आयोगाने जाहीर केला आहे. रविवारी (ता. १८ डिसेंबर) आवश्यक त्या ठिकाणी मतदान घेण्यात येईल तर मंगळवारी (ता. २० डिसेंबर) मतमोजणी होऊन निकाल जाहीर केले जातील.

ऑक्टोबर ते डिसेंबर या कालावधीत मुदत संपणाऱ्या ग्रामपंचायती, नव्याने स्थापित ग्रामपंचायती तसेच समर्पित आयोगाच्या अहवालात दिसत नसल्यामुळे मागील निवडणुकांमधून वगळलेल्या ग्रामपंचायतींच्या (सदस्य पदासह थेट सरपंच पदाच्या) सार्वत्रिक निवडणुकांसाठी संगणकप्रणालीद्वारे निवडणूक कार्यक्रम राबविण्यात प्रत्यक्ष निवडणूक कार्यक्रमानुसार शुक्रवार ता. १८ नोव्हेंबर रोजी तहसीलदार निवडणुकीची नोटीस प्रसिद्ध करतील.

सोमवार ता. २८ नोव्हेंबर ते शुक्रवार ता. २ डिसेंबर या कालवधीत सकाळी ११ ते दुपारी ३ वाजेपर्यंत नामनिर्देशनपत्रे सादर करता येतील. सोमवारपासून ५ डिसेंबरला अर्जांची छाननी होईल. बुधवारी ता. ७ दुपारी तीनपर्यंत अर्ज मागे घेता येतील. आवश्यक असल्यास रविवारी ता. १८ डिसेंबर रोजी सकाळी साडेसात ते सायंकाळी साडेपाच या वेळेत मतदान घेण्यात येईल.

निवडणूक होणाऱ्या ग्रामपंयातींमध्ये परभणी तालुक्यातील २९ ग्रामपंचायती, जिंतूर तालुक्यातील ३३, सेलू तालुक्यातील ११, मानवत तालुक्यातील ८, पाथरी तालुक्यातील ७, सोनपेठ तालुक्यातील ३, गंगाखेड १३, पालम तालुक्यातील १३, पूर्णा तालुक्यातील १३ ग्रामपंचायतींचा समावेश आहे.