टाकरखेडासंभू, अमरावती : भातकुली तालुक्यात ११ ग्रामपंचायतींमध्ये निवडणुकांची (Gram Panchayat Elections) रणधुमाळी सुरू झाली असून गावपुढारी कामाला लागले आहेत. तालुक्यात ११ सरपंचपदासह ९५ सदस्यांकरिता निवडणूक (Elections) होऊ घातली आहे. याकरिता १८ डिसेंबरला मतदान (Voting), तर २० डिसेंबर रोजी मतमोजणी होणार आहे.

भातकुली तालुक्यात ५० च्या ग्रामपंचायती आहेत. त्यामधील ११ ग्रामपंचायतींचा कार्यकाळ डिसेंबरपर्यंत संपुष्टात येत असल्याने येथे निवडणुका लावण्यात आल्या आहेत. यात पाच ग्रामपंचायतींचा नोव्हेंबरमध्ये, तर सहा ग्रामपंचायतींचा कार्यकाळ डिसेंबरच्या पहिल्या आठवड्यात संपत आहे. याकरिता २८ नोव्हेंबर ते दोन डिसेंबरदरम्यान नामांकन अर्ज स्वीकारले जाणार आहेत.

या ११ ग्रामपंचायतींमध्ये ११ सरपंचांसह ९५ सदस्य निवडून द्यावयाचे आहेत. त्यामुळे आता दिग्गजांसह युवकांनीदेखील उडी घेतली असून, या निवडणुकांमध्ये चांगली रंगत येणार आहे. यात पूर्णानगर ग्रामपंचायतींमध्ये १३, कुमागड सात, कानफोडी सात, पोहरापूर्णा सात, वाकी रायपूर सात, खोलापूर १७, शिवणी बुद्रुक सात, हरतोटी सात, सोनारखेडा सात, परलाम नऊ व खालखोनी ग्रामपंचायतींमध्ये सात सदस्य पदांकरिता निवडणूक होणार आहे. या ग्रामपंचायतींमध्ये पहिल्यांदाच थेट सरपंचपदाकरिता निवडणुका होऊ घातल्याने नागरिकांना चांगलीच उत्सुकता लागली आहे.