Crop Damage परभणी, हिंगोली जिल्ह्यांतील ४४ मंडलांत रविवारी (ता.७) सकाळी ८ पर्यंतच्या २४ तासांमध्ये हलका ते जोरदार पाऊस झाला. या दोन जिल्ह्यांतील पावसाचे (Unseasonal Rain) सत्र सुरुच आहे.

त्यामुळे काढणीला आलेली उन्हाळी भुईमूग, बाजरी, ज्वारी, कांदा, टोमॅटोसह भाजीपाला पिके, आंबा, लिंबू आदींची नासाडी थांबत नाही. हळद सततच्या पावसात भिजत असल्यामुळे शेतकऱ्यांना मोठा आर्थिक फटका बसला आहे.

परभणी जिल्ह्यातील परभणी, जिंतूर, सेलू, मानवत, पाथरी, सोनपेठ, गंगाखेड, पालम, पूर्णा तालुक्यांतील १९ मंडलांत हलका ते जोरदार पाऊस झाला. जिंतूर तालुक्यातील बोरी, आडगाव बाजार, पाथरी तालुक्यातील कासापुरी, सोनपेठ तालुक्यातील आवलगाव, शेळगाव, गंगाखेड तालुक्यातील गंगाखेड या मंडलात पावसाचा जोर राहिला.

जिल्ह्यात गेल्या २४ तासांत सरासरी १.७ मिमी तर एप्रिल महिन्यात आजवर एकूण २१.४ मिमी पाऊस झाला. हिंगोली जिल्ह्यातील हिंगोली, कळमनुरी, वसमत, औंढा नागनाथ, सेनगाव तालुक्यातील २५ मंडलांत पाऊस झाला.

हिंगोली तालुक्यातील बासंबा, माळहिवरा, खंबाळा, कळमनुरी तालुक्यातील कळमनुरी, वाकोडी, नांदापूर, आखाडा बाळापूर, वसमत तालुक्यातील वसमत, अंबा, हयातनगर, हट्टा, टेंभुर्णी, कुरुंदा, औंढा नागनाथ तालुक्यातील औंढा नागनाथ, साळणा, जवळा बाजार मंडलात पावसाचा अधिक जोर राहिला.