Yavatmal News : जिल्ह्यात पूर, अतिवृष्टीमुळे झालेल्या नुकसानीची स्थिती संवेदनशील आहे. प्रशासनाने शेती नुकसानीचे पंचनामे दोन दिवसांत पूर्ण करून अहवाल सादर करावा, असे निर्देश जिल्हाधिकारी डॉ. पंकज आशिया यांनी प्रशासनाला दिले.

डॉ. आशिया यांनी मंगळवारी (ता.२५) जिल्ह्यातील पूरपरिस्थिती व मदत वितरणाचा आढावा घेतला. बैठकीनंतर नुकसानग्रस्त भागास भेटी देऊन पाहणी केली.

जिल्ह्यातील अनेक भागात अतिवृष्टी झाली. त्यामुळे नद्या, नाल्यांना आलेल्या पुरामुळे लाखो हेक्टर शेतीचे नुकसान झाले. कमी अधिक प्रमाणात जिल्ह्यात सर्वत्र मोठे नुकसान झाले. घरात पुराचे पाणी शिरल्याने पडझड झालेली घरे, खरडून निघालेल्या शेत जमिनी, शाळा, अंगणवाड्यांसारख्या शासकीय मालमत्तेच्या नुकसानीचा आढावा सर्व उपविभागीय अधिकारी व तहसीलदारांकडून जिल्हाधिकाऱ्यांनी घेतला.

त्यानंतर जिल्हाधिकाऱ्यांनी यवतमाळ तालुक्यातील काही नुकसानग्रस्त भागांत पाहणी केली. तालुक्यातील कापरा गावातील शेतकऱ्यांच्या बांधावर जिल्हाधिकारी पोहोचले. तेथील नुकसानग्रस्त शेती, पूल आदींची पाहणी करून तातडीने पंचनामे करण्याचे निर्देश त्यांनी अधिकाऱ्यांना दिले.

त्यानंतर तालुक्यातीलच लासिना येथील जिल्हा परिषद शाळेला त्यांनी भेट देवून पाहणी केली. या वेळी जिल्हा परिषदेचे मुख्य कार्यकारी अधिकारी डॉ. मयंक घोष, निवासी उपजिल्हाधिकारी प्रकाश राऊत, जिल्हा आपत्ती व्यवस्थापन अधिकारी सतीश मून, तहसीलदार योगेश देशमुख आदी उपस्थित होते.