खामगाव ः या मतदार संघात परतीच्या पावसाने अतोनात नुकसान (Crop Damage) केले आहे. शेतकऱ्यांना दिलासा देण्यासाठी खामगाव व शेगाव तालुक्यांत तातडीने पंचनामे (Crop Damage Survey) करण्याच्या सूचना आमदार ॲड. आकाश फुंडकर यांनी केली. त्यांनी तहसीलदार तसेच उपविभागीय अधिकारी यांना याबाबत निर्देश दिले.

खामगाव व शेगाव तालुक्यांत गेल्या आठवड्यापासून परतीच्या पावसाने थैमान घातले आहे. ऐन सोयाबीन, तूर व कापूस काढणीच्या वेळेवर आलेल्या पावसाने शेतकऱ्यांचे अतोनात नुकसान झाले आहे. सोंगलेल्या शेतकऱ्यांच्या सोयाबीनच्या गंजी शेतात पडून आहेत.

तसेच ज्यांनी सोंगणी केलेले नाही अशा शेतकऱ्यांचे सोयाबीन आता काढणीयोग्य राहिलेले नाही. पुन्हा दोन दिवसांपूर्वी अतिवृष्टीमुळे सर्वसामान्य शेतकऱ्यांच्या तोंडचा घास पळविला आहे. तुरीसह कपाशीचेसुद्धा मोठे नुकसान झाले आहे.

कपाशीचे बोंड गळून पडले आहेत. त्यामुळे या शेतकऱ्यांना दिलासा मिळावा यासाठी तातडीने नुकसानीचे पंचनामे करावेत, असे निर्देश आमदार फुंडकर यांनी दिले. तसेच शेतकऱ्यांना नुकसान भरपाई मिळावी यासाठी शासन स्तरावर सतत पाठपुरावा करणार असल्याचे सांगितले.