Nanded News : खरीप पिकांसाठी दुसऱ्या हप्त्यात देण्यात येणारा युरिया, तसेच डीएपी खताचा राखीवसाठा प्रशासनाने जिल्हा पणन अधिकाऱ्यांच्या माध्यमातून जिल्ह्यातील कृषी निविष्ठा विक्रेत्यांना वितरित केला आहे. यात डीएपी १००१ टन, तर युरिया ८८० टनांचा समावेश, असल्याची माहिती कृषी विभागाने दिली.

जिल्ह्यात शेतकऱ्यांकडून सर्वाधिक डीएपी आणि युरिया खताची मागणी असते. अनेक वेळा डीएपी, युरिया खते बाजारात मिळत नाहीत. मागणी लक्षात घेता काही विक्रेते अधिक दराने खतविक्री करतात. जिल्ह्यात सध्या खरिपाच्या पेरण्या आटोपल्या आहेत.

पिकांना नत्राचा दुसरा हप्ता देण्यासाठी शेतकरी युरियाचा वापर मोठ्या प्रमाणात करतात. बाजारात युरिया उपलब्ध झाला नाही तर तो अधिकच्या दराने विक्री होण्याची शक्यता असते. तसेच अनेक पिकांना संयुक्त खतात डीएपीचा वापर अधिक प्रमाणात होतो.

यामुळे डीएपी तसेच युरियाचा राखीव साठा प्रशासनाला दरवर्षी करावा लागतो. यंदाही कृषी विभाग जिल्हा प्रशासनाच्या माध्यमातून युरिया, डीएपी खताचा राखीव साठा (बफर स्टॉक) केला आहे. हा साठा बुधवारी (ता. १९) कृषी निविष्ठा विक्रेत्यांना वितरित केला आहे. यासाठी कृषी विभागाने तालुकानिहाय नियोजन करून शेतकऱ्यांना खताचा पुरवठा व्हावा, यासाठी वितरण केले आहे.