Maharashtra Monsoon Session 2023 Live : विधिमंडळाच्या पावसाळी अधिवेशनाला आजपासून सुरूवात झाली. ठाकरे गटाने विधिमंडळ सचिवांना पत्र पाठवून विधान परिषदेच्या उपसभापती निलम गोऱ्हे, मनिषा कायंदे आणि विप्लव बजोरिया या तीन आमदारांना अपात्र करण्याची मागणी केली आहे.

यासंदर्भात शिवसेनेचे आमदार अनिल परब म्हणाले, `` विधानपरिषदेच्या उपसभापती निलम गोऱ्हे यांच्या विरोधात भाजपने याआधीच अविश्वासाची नोटीस दिलेली होती. ती अजूनही कायम आहे. आता आम्ही त्यांच्या विरोधात नोटीस दिली आहे. याचा अर्थ सत्ताधारी आणि विरोधी अशा दोघांचाही उपसभापतींवर विश्वास नाही. त्यांना पदावर राहण्याचा नैतिक अधिकार नाही.``

निलम गोऱ्हे यांनी काही दिवसांपूर्वी एकनाथ शिंदे गटात प्रवेश केला आहे. त्यामुळे ठाकरे गट त्यांच्या विरोधात आक्रमक झाला आहे.

दरम्यान, विधानपरिषदेच्या उपसभापतीसारख्या घटनात्मक पदावर असताना निलम गोऱ्हे यांनी पक्षांतर केल्यामुळे त्यांच्यावर राजकीय वर्तुळातून टीका होत आहे. उपसभापतीपद हे पक्षनिरपेक्ष व सर्व पक्षांना समान न्याय देणारे असणे अपेक्षित असताना गोऱ्हे या पक्षीय राजकारणाचा भाग बनल्याबदद्ल त्यांच्यावर आक्षेप घेतला जात आहे.

विधानपरिषदेत आज शोक प्रस्तावावर चर्चा सुरू असताना शेतकरी कामगार पक्षाचे आमदार जयंत पाटील यांनी हा मुद्दा विधानपरिषदेत उपस्थित करण्याचा प्रयत्न केला. परंतु उपसभापतींनी त्याला परवानगी नाकारली.