पुणे : बंगालचा उपसागरात (Bay Of Bengal) रविवारी (ता.२३) सायंकाळी ‘सितरंग’ चक्रीवादळाची (Sitarang Cyclone) निर्मिती झाली आहे. ही वादळी प्रणाली ईशान्य दिशेने जात आहे. आज (ता. २५) सकाळपर्यंत बांगलादेशाच्या बरिसाल जवळ असलेल्या तिंकोना बेटे, सॅनद्वीप जवळ किनाऱ्याला हे चक्रीवादळ धडकणार आहे. याचा महाराष्ट्रावर कोणताही प्रभाव जाणवणार नाही, अशी माहिती मिळाली.

सुरूवातीला पूर्व किनाऱ्याकडे येणारी ही प्रणाली पूर्व-मध्य बंगालच्या उपसागरातून ईशान्य दिशेकडे वळली आहे. सोमवारी (ता. २४) रात्रीपर्यंत त्याचे तीव्र चक्रीवादळात रूपांतर होण्याचे संकेत आहेत. सोमवारी सकाळी या वादळाचे केंद्र पश्चिम बंगाल जवळील सागर बेटांपासून ३८० किलोमीटर दक्षिणेकडे, तर बांगलादेशाच्या बरिसाल पासून ५२० किलोमीटर नैर्ऋत्येकडे होते.

‘सितरंग’ चक्रीवादळाच्या प्रभावामुळे पूर्व, ओडिशा, पश्चिम बंगाल, बांगलादेशच्या किनाऱ्यावर ढगांची दाटी झाली आहे. या भागासह ईशान्य भारतातील राज्यांमध्ये जोरदार पावसाची शक्यता आहे. तसेच या वादळी प्रणालीमुळे ओडिशा, पश्चिम बंगाल, बाग्लांदेशच्या किनाऱ्यालगत समुद्रात ताशी ९० ते ११० किलोमीटर वेगाने वारे वाहण्याचा, उंच लाटा उसळण्याचा इशारा देण्यात आला आहे.

किमान तापमानात घट

नैर्ऋत्य मोसमी वाऱ्यांनी (मॉन्सून) देशाचा निरोप घेताच राज्यात निरभ्र आकाश झाले आहे. पावसाने उघडीप दिल्याने राज्याच्या किमान तापमानात घट झाली आहे. त्यामुळे पहाटे गारठा जाणवू लागला आहे. आज (ता. २५) राज्यात मुख्यतः कोरड्या हवामानाचा अंदाज असून, आता गुलाबी थंडीची प्रतीक्षा आहे.

रविवारी (ता. २३) रात्रीपासूनच राज्याच्या विविध भागात गारठा जाणवू लागल्याने थंडीची चाहूल लागली आहे. सोमवारी (ता. २४) सकाळपर्यंतच्या २४ तासांमध्ये राज्यात बहुतांश ठिकाणी किमान तापमान २० अंशांच्या खाली आले. महाबळेश्वर येथे राज्यातील नीचांकी १२.२ अंश सेल्सिअस तापमानाची नोंद झाल्याचे हवामान विभागातर्फे सांगण्यात आले.

सोमवारी (ता. २४) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे २९.८ (१४.४), जळगाव ३३.७(१५.०), कोल्हापूर ३०.० (१८.६), महाबळेश्वर २४.५(१२.२), मालेगाव - (१८.६), नाशिक २९.५ (१४.२), सांगली ३०.२(१६.५), सातारा २८.८(१४.६), सोलापूर ३१.२ (१६.९), सांताक्रूझ ३४.३(२०.६), डहाणू ३३.८ (२०.४), रत्नागिरी ३४.५ (१९.२), औरंगाबाद २९.८ (१४.१), नांदेड २९.४ (१७.४), उस्मानाबाद ३०.६ (१८.५), परभणी ३०.६ (१७.०), अकोला ३३.४ (१८.०), अमरावती ३२.४ (१५.३), ब्रह्मपुरी ३३.० (१७.८), बुलडाणा २९.६ (१७.८), चंद्रपूर ३२.४ (१८.०), गडचिरोली ३०.०(१६.८), गोंदिया ३०.२ (१७.८), नागपूर ३१.४ (१७.०), वर्धा ३१.२(१७.०), यवतमाळ ३२.४ (१४.५).