पुणे : बंगालचा उपसागरात घोंघावत असलेले ‘असानी’ चक्रीवादळ पूर्व किनारपट्टीकडे झेपावत आहे. ही प्रणीली आज (ता. १०) पूर्व किनारपट्टीकडे येणार असून, किनाऱ्याजवळ येताच तिची दिशा बदलणार आहे. हे चक्रीवादळ ओडिशा किनारपट्टीला समांतर समुद्रात पश्चिम बंगालच्या दिशेने जाणार आहे. त्यामुळे चक्रीवादळाचा महाराष्ट्रावर फारसा प्रभाव जाणवणार नाही.

बंगालच्या उपसागरात रविवारी (ता. ८) सकाळी ‘असानी’ चक्रीवादळीची निर्मिती झाली. ही वादळी प्रणाली आणखी तीव्र होऊन पूर्व किनाऱ्याकडे सरकत आहे. सोमवारी सकाळी या वादळाचे केंद्र अंदमानच्या पोर्टब्लेअरपासून ७७० किलोमीटर वायव्येकडे, विशाखापट्टणम (आंध्रप्रदेश) पासून ५०० किलोमीटर आग्नेयेकडे तर पूरी (ओडिशा) पासून ६५० किलोमीटर दक्षिणेकडे होते. मंगळवारी सायंकाळपर्यंत (ता. १०) हे चक्रीवादळ उत्तर आंध्र प्रदेश, ओडिशाच्या किनाऱ्याकडे येणार असून, त्यानंतर ही प्रणाली पश्चिम बंगालकडे सरकण्याची शक्यता आहे. गुरूवारपर्यंत (ता. १२) या वादळाची तीव्रता कमी होणार आहे.

या प्रणालीमुळे बंगालच्या उपसागरात ताशी १०० ते १२० किलोमीटर वेगाने वारे वाहत आहे. पूर्व किनारपट्टी कडे येताना वाऱ्यांचा वेग कमी होत ताशी ८५ ते १०५ किलोमीटर होण्याचा अंदाज आहे. मात्र यावेळी समुद्र खवळून उंच लाटा उसळणार असल्याने मासेमारीसाठी खोल समुद्रात न जाण्याच इशारा देण्यात आला आहे. आज (ता. १०) आंध्र प्रदेश, ओडिशाच्या किनाऱ्यावर जोरदार वाऱ्यासह, मुसळधार पावसाची इशारा हवामान विभागाने दिला आहे.