चांदवड, जि. नाशिक : शेतीला चारच तास वीजपुरवठा (Power Supply) होतो आहे. पिकांना पाणी द्यायचे तरी कसे? आम्ही शेती करावी की नाही? असा सवाल चांदवड तालुक्यातील शेतकऱ्यांना महावितरण (Mahavitaran) कंपनीच्या कारभारामुळे पडला आहे. विहिरीत पाणी असूनही विजेअभावी पिकांना पाणी देता येईना अशी परिस्थिती तालुक्यातील अनेक गावांत आहे.

अगोदरच लोडशेडिंगमुळे फक्त आठच तास थ्री फेज वीजपुरवठा केला जातो. आता फक्त चारच तास वीजपुरवठा केला जातो आहे. अपुऱ्या वीजपुरवठ्यामुळे पिकांना पाणी देता येत नाही. डोळ्यांदेखत पिके होपळताना पाहावी लागत आहेत. अगोदर अतिवृष्टीमुळे पिके खराब झाली आहेत. त्यात आता दिवसा फक्त चारच वीजपुरवठा तोही सुरळीत नाही.

इतर वेळा सिंगल फेज पुरवठा तोही वेळेवर होत नाही. १३२ के.व्ही. सबस्टेशनच्या ओव्हरलोडमुळे आठ तास वीजपुरवठा होत नसल्याचे महावितरणचे अधिकारी सांगत आहेत. ओव्हरलोडमुळे घरगुती ग्राहकांनाही सुरळीत वीजपुरवठा होत नाही. बहुतांश वेळा ग्रामीण भागातील नागरिकांना रात्री अंधारातच रहावे लागते. महावितरण कंपनीने शेतीला व घरगुती ग्राहकांना सुरळीत वीजपुरवठा करावा, अशी मागणी शेतकऱ्यांनी केली आहे.