औरंगाबाद : मराठवाड्यातील जालना, औरंगाबाद, बीड, उस्मानाबाद व लातूर या पाच जिल्ह्यांत अनेक मंडलांत गुरुवारी (ता. ६) सकाळपर्यंतच्या २४ तासांत तुरळक हलका पाऊस (Rainfall) झाला. काही ठिकाणी पावसाबरोबर आलेल्या वादळी वाऱ्याने (Stormy Rain) कपाशीचे पीक आडवे (Cotton Crop Damage) झाले.

औरंगाबाद जिल्ह्यातील ६५ पैकी ३९ मंडलांत गुरुवारी सकाळपर्यंतच्या २४ तासांत तुरळक, हलका पाऊस झाला. जालना जिल्ह्यातील ४९ पैकी ४१ मंडलांत तुरळक, हलका पाऊस झाला. जिल्ह्यातील मंठा तालुक्यात पावसाचा जोर किंचित अधिक होता.

मंठा मंडलात झालेला २६.३ मिमी पाऊस जिल्ह्यात सर्वाधिक राहिला. बीड जिल्ह्यातील ६३ पैकी २० मंडलांत तुरळक, हलका पाऊस झाला. माजलगाव तालुक्यातील गंगामसला मंडळात ३२.५ मिमी तर गेवराई तालुक्यातील पाचेगाव मंडलात सर्वाधिक ३३.३ मिमी पावसाची नोंद झाली. इतर मंडलांतील पाऊस तुरळक स्वरूपाचाच होता.

लातूर जिल्ह्यातील ६० पैकी ४३ मंडलांत तुरळक, हलका पाऊस झाला. तर उस्मानाबाद जिल्ह्यातील ४२ पैकी २१ मंडलांत तुरळक हलक्या पावसाची हजेरी लागली. काढणीला आलेल्या सोयाबीनची व वेचणीला आलेल्या कापसावर कमी अधिक पडणारा पाऊस संकट घेऊन आला आहे. गुरुवारी दुपारपर्यंत बहुतांश भागात आकाशात ढगांची गर्दी कायम होती तर ऊन सावलीचा खेळ सुरू होता.