इंदापूर, जि. पुणे ः गावातील कचरा गावातच योग्य ठिकाणी कुजवून घनकचरा व्यवस्थापनातून (Waste Management) खतनिर्मिती प्रकल्प (Fertilizer Production) गावासाठी फायदेशीर आहे. पहिल्या टप्प्यात इंदापूर तालुक्यातील ५६ गावांमध्ये सदर प्रकल्प सुरू आहेत.

काही गावांतून जागेचा प्रश्‍न वगळता उर्वरित गावांमध्येही प्रकल्प सुरू करण्यासाठी कार्यवाही सुरू आहे. ही समाधानाची बाब आहे, असे प्रतिपादन पुणे जिल्हा परिषदेचे मुख्य कार्यकारी अधिकारी आयुष प्रसाद यांनी केले.

इंदापूर येथील पंचायत समिती सभागृहात विविध विभागांच्या आढावा बैठकीनंतर आयोजित पत्रकार परिषदेत आयुष प्रसाद बोलत होते.

या वेळी आयोजित आढावा बैठकीत गटविकास अधिकारी विजय परीट, सहायक गट विकास अधिकारी रामचंद्र शिंदे, उपअभियंता बांधकाम विभाग शिवकुमार कुपल, उपअभियंता पाणीपुरवठा विभाग पवार, बाल विकास प्रकल्प अधिकारी काळे व अमोल मेरगळ आरोग्य अधिकारी सुरेखा पोळ, बँक ऑफ महाराष्ट्रचे शाखा व्यवस्थापक मेहेरकर व पंचायत समितीचे सर्व अधिकारी, कर्मचारी उपस्थित होते.

या वेळी प्रसाद पुढे म्हणाले, की इंदापूर तालुक्यात घरकुलाच्या योजनेसाठी २ हजार ५०० लाभार्थी निश्‍चित करण्यात आले आहेत.

घरकुलांचा पहिला हप्ता घेऊनही काम सुरू न करणाऱ्या सुमारे ८०० लाभार्थ्यांकडून लोकअदालतीच्या माध्यमातून नोटिसा देण्यात आल्या आहेत. तो हप्ता परत वसूल करण्याचा निर्णय घेण्यात आला आहे. तसेच कामे लवकरात लवकर मार्गी लावण्याच्या सूचना त्यांनी केल्या आहेत.

या वेळी आयुष प्रसाद यांनी इंदापूर तालुक्यातील शाळांमध्ये गुणवत्ता वाढीसाठी राबविण्यात येत असलेल्या उपक्रमाचे कौतुक केले. तर जलजीवनमध्ये पुणे जिल्हा अग्रेसर असून जवळपास शंभर टक्के निविदा प्रसिद्ध केले आहेत. यामध्ये इंदापूर तालुक्यात ३५ कामांच्या वर्क ऑर्डर दिलेल्या आहेत.

परंतु काही ठेकेदारांनी काम सुरू केलेले नाही. ठेकेदारांच्या वेगवेगळ्या अडचणी असू शकतात. गटविकास अधिकारी व अभियंत्यांनी त्या समजून घ्याव्यात. मात्र ठेकेदारांनी उदासीनता न दाखवता वेळेत व दर्जेदार कामे करण्यासाठी दक्ष राहवे, असे आवाहन केले.

तालुका ‘लम्पी स्कीन’मुक्त

इंदापूर तालुका लम्पी स्कीनमुक्त ठेवण्यासाठी जिल्हा परिषद व इंदापूर तालुका पशुवैद्यकीय विभागाने केलेल्या कामांचे जिल्हा परिषदेचे मुख्य कार्यकारी अधिकारी आयुष प्रसाद यांनी कौतुक केले. आगामी काळातही जनावरांचे लसीकरण करून योग्य उपचार करीत तालुका लम्पीमुक्त कायम ठेवण्यासाठी प्रयत्न करण्याच्या सूचनादेखील त्यांनी केल्या.