पुणे : उत्तरेकडील राज्यांमध्ये वाढलेला गारठा (Cold Weather) महाराष्ट्राकडे सरकण्याची शक्यता आहे. राज्याच्या किमान तापमानात (Minimum Temperature) उद्या (ता. १७) पासून सरासरीच्या तुलनेत २ ते ३ अंशांची घट होण्याचे संकेत आहेत. परिणामी राज्यातही किमान तापमानात घट होऊन गारठा (Cold) वाढण्याची शक्यता आहे. मंगळवारी (ता. १५) सकाळपर्यंतच्या २४ तासांमध्ये धुळे येथील कृषी महाविद्यालय आणि गोंदिया येथे ११.५ अंश सेल्सिअस तापमानाची नोंद झाली.

राज्यात थंडीची चाहूल लागल्यानंतर किमान आणि कमाल तापमानात सातत्याने चढ-उतार होत आहेत. पहाटे थंडी आणि दुपारी चटका ही स्थिती आहे. राज्यात सध्या किमान तापमान ११ ते २५ अंशांच्या दरम्यान आहे. उत्तरेकडील थंड व कोरडे वारे महाराष्ट्राकडे येऊ लागल्याने उद्यापासून (ता. १७) राज्यात गारठा वाढण्याची शक्यता आहे.

पहाटे जाणवणाऱ्या गारठ्या बरोबरच धुके, दव पडणे सुरूच आहे. किमान तापमान कमी होत असतानाच कमाल तापमान ३० ते ३५ अंशांच्या आसपास कायम आहे. आज (ता. १६) राज्यात कोरड्या हवामानासह व आकाश निरभ्र राहून, किमान तापमानात घट होण्याचा अंदाज हवामान विभागाने वर्तविला आहे.

कमी दाब क्षेत्राचे संकेत

बंगालच्या उपसागरात दक्षिण अंदमान बेटांजवळ समुद्र सपाटीपासून ५.८ किलोमीटर उंचीवर चक्राकार वारे वाहत आहेत. या वाऱ्यांच्या प्रभावामुळे या भागात आज (ता. १६) कमी दाबाचे क्षेत्र तयार होण्याची शक्यता आहे. वायव्येकडे सरकणारी ही प्रणाली शुक्रवारपर्यंत (ता. १८) आणखी तीव्र होण्याचे संकेत आहेत. आग्नेय अरबी समुद्रात लक्षद्वीप बेटांजवळ समुद्र सपाटीपासून ४.५ किलोमीटर उंचीवर चक्राकार वाऱ्यांची स्थिती आहे.

मंगळवारी (ता. १५) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे ३१.७ (१५.४), जळगाव ३२.० (१५.७), धुळे ३१.० (११.५), कोल्हापूर ३१.६ (२०.१), महाबळेश्वर २५.६(१५.४), नाशिक ३१.१ (१५.२), निफाड ३०.४ (१२.६), सांगली ३२.२(१९.१), सातारा ३०.८(१७.४), सोलापूर ३३.३ (१८.९), सांताक्रूझ ३४.७(२०.८), डहाणू ३४.२ (२०.५), रत्नागिरी ३५.८ (२२.६), औरंगाबाद ३०.४ (१३.०), नांदेड ३३.६ (१६.०), परभणी ३१.७ (१५.२), अकोला ३२.३ (१६.०), अमरावती ३२.२ (१४.१), बुलडाणा ३०.३ (१५.७), ब्रह्मपुरी ३२.२ (१५.३), चंद्रपूर २९.६ (१५.८), गडचिरोली ३१.०(१५.०), गोंदिया ३०.०(११.५), नागपूर ३०.१ (१३.४), वर्धा ३०.० (१३.४), वाशीम ३२.८ (१६.६), यवतमाळ ३०.५ (१२.५).