Nashik Bazar News : चांदवड कृषी उत्पन्न बाजार समितीचे संचालक व प्रहार जनशक्ती पक्षाचे जिल्हाध्यक्ष गणेश निंबाळकर यांनी बाजार समितीचा मिळणारा मासिक बैठक भत्ता नाकारला आहे. याबाबत त्यांनी सभापती यांना लेखी पत्र दिले आहे. त्यांच्या या निर्णयाचे शेतकरी वर्गातून कौतुक होत आहे. एकीकडे शेतकरी अडचणीत आहे; त्यामुळे मिळणारा अधिकचा भत्ता कशाला, असे सांगत निंबाळकर यांनी हा निर्णय घेतला आहे.

समितीच्या २१ जुलैच्या मासिक बैठकीनंतर निंबाळकर यांना समितीकडून ८८० रुपये मासिक बैठक भत्ता देऊ केला. मात्र घरापासून चांदवड येथील बाजार समिती कार्यालयात येण्यासाठी एवढा खर्च अधिकचा आहे. त्यामुळे मी नम्रपणे नाकारत आहे, माझ्या नावाने पुढील काळात अशी तरतूद होऊ नये, याबाबतचे लेखी पत्र समितीकडे दिले.

समितीच्या मासिक भत्त्यामध्ये ८८० रुपये देय आहेत. त्यामध्ये ४५० रुपये दैनिक भत्ता, ३७५ रुपये बैठक भत्ता व ५५ रुपये प्रवास भत्ता अशी तरतूद असल्याचे निंबाळकर यांनी सांगितले. याबाबत त्यांनी सचिवांना विचारले असता त्यांनी सविस्तर सांगितले नाही. तर समितीने भत्त्यासंबंधी तरतुदी केल्या असून उपविधीमध्ये त्याचा उल्लेख असल्याचे त्यांनी सांगितल्याचे निंबाळकर म्हणाले.