छत्रपती संभाजीनगर : राज्याचे कृषिमंत्रीपद (Agriculture Minister) मराठवाड्याच्या वाट्याला आले. परंतु, या विभागातील कृषी विभागातील (Agriculture Department) महत्त्वाच्या अधिकाऱ्यांची पदेच महिनोंमहिने रिक्त आहेत.

खुद्द कृषिमंत्र्यांच्या जिल्ह्यातच जिल्हा अधीक्षक पदाचा प्रभार जिल्हा परिषदेच्या कृषी विकास अधिकाऱ्यांच्या खांद्यावर आहे.

जालन्यात ज्यांच्यावर प्रभारी जबाबदारी आहे, तेही मार्चअखेर निवृत्त होत आहेत. त्यामुळे कृषीच्या गतिमानतेलाही ग्रहण लागल्याची स्थिती आहे.

केवळ कृषिमंत्री पदच नव्हे तर सहकार, रोजगार हमी व फलोत्पादन ही महत्त्वाची खाती मराठवाड्याची राजधानी छत्रपती संभाजीनगरच्या वाट्यावर आहेत.

तसेच केंद्र सरकारमधील अर्थराज्यमंत्री व रेल्वे राज्यमंत्री अशी मंत्र्यांची खातीही मराठवाड्यातील उद्योग नगरी व राजधानीच्या वाटेवर असल्याचे सांगायला आहे.

परंतु या मंत्र्यांच्या जिल्ह्यातच कृषी अधिकाऱ्यांची महत्त्वाची पदेच महिनोंमहिने रिक्त आहेत. छत्रपती संभाजीनगरमधील जिल्हा जिल्हा अधीक्षक कृषी अधिकारी पदाचा भार जिल्हा परिषदेच्या कृषी विकास अधिकाऱ्याच्या खांद्यावर आहे.

लातूर कृषी विभागात पाच जिल्ह्यांत जिल्हा अधीक्षक कृषी अधिकाऱ्यांची सहा पदे मंजूर आहेत. त्यापैकी चार भरली आहेत. धाराशिव तसेच लातूरच्या विभागीय कृषी सहसंचालक कार्यालयातील जिल्हा अधीक्षक कृषी अधिकारी पद रिक्त आहे.

कृषी विकास अधिकाऱ्यांची पाच पैकी तीनच पदे भरली असून दोन रिक्त आहेत. उपविभागीय कृषी अधिकाऱ्यांच्या मंजूर १० पैकी निम्मी ५ पदे रिक्त आहेत. तालुका कृषी अधिकारी, तंत्र अधिकाऱ्यांच्या मंजूर १०३ पदांपैकी केवळ ६१ भरली आहेत.

तब्बल ४२ पदे रिक्त आहेत. याशिवाय वर्ग दोन कनिष्ठ कृषी अधिकाऱ्यांच्या मंजूर १९८ पदांपैकी १४८ पदे भरली आहेत. ५० पदे रिक्त आहेत.

छत्रपती संभाजीनगर कृषी विभागातील तीन जिल्ह्यांत वर्ग-१ ची २९ पदे मंजूर असताना केवळ नऊ पदे भरली. तर तब्बल २० पदे रिक्त आहेत. वर्ग-२ च्या मंजूर ६९ पदांपैकी ३५ पदे भरली असून तब्बल ३४ पदे रिक्त आहेत.

याशिवाय कनिष्ठ वर्ग-२ ची १६४ पदे मंजूर असताना १०७ पदे भरली आहेत तर तब्बल ५७ पदे रिक्त आहेत. आत्मा यंत्रणेतील प्रकल्प संचालकांची तीन पदे रिक्त आहेत. उपसंचालकांची सर्व सहाही पदे रिक्त आहेत.

विभागातील तिन्ही जिल्ह्यांत कृषीच्या वरिष्ठ अधिकाऱ्यांची पदे रिक्त आहेत. त्यामुळे योजनांच्या अंमलबजावणीत अडचणी येतात. महत्त्वाची रिक्त पदे भरावीत, यासाठी प्रशासनाच्या वरिष्ठ पातळीवर व शासन दरबारी पाठपुरावा सुरू आहे.

- डॉ. डी. एल. जाधव, विभागीय कृषी सहसंचालक, छत्रपती संभाजीनगर.