Mumbai News : महाराष्ट्र पशू व मत्स्य विज्ञान विद्यापीठाला यंदापासून अकोला येथे नवीन पशुवैद्यकीय महाविद्यालय सुरू करण्यास मान्यता देण्याचा आदेश राज्य सरकारने काढला आहे. एप्रिल महिन्यात मंत्रिमंडळ बैठकीत या महाविद्यालयास मान्यता देण्यात आली होती.

राष्ट्रीय पशू विज्ञान अकादमी, नवी दिल्ली या संस्थेने सादर केलेल्या अहवालानुसार, देशात सद्यःस्थितीत ५० टक्के पशुवैद्यकांची कमतरता आहे.

२०३५ पर्यंत सव्वा लाख पशुवैद्यकांची आवश्यकता भासेल, असे अहवालात नमूद केले होते. महाराष्ट्रात आलेल्या लम्पी स्कीन रोगाच्या पार्श्वभूमीवर मोठ्या प्रमाणात बाहेरून सेवा घेण्यात आली.

सध्या राज्यात पशुसंवर्धन सेवा देण्यास अपुरे मनुष्यबळ असल्याने नवीन पशुवैद्यकीय महाविद्यालयांना मान्यता देण्याचा निर्णय राज्य सरकारने घेतला आहे.

एकूण १६४ पदांना मान्यता

अकोला येथे नवीन पशुवैद्यकीय महाविद्यालय २०२३-२४ च्या शैक्षणिक वर्षापासून सुरू करण्यात येईल. यासाठी शिक्षक संवर्गातील ५६, शिक्षकेत्तर संवर्गातील ४८, तसेच बाह्यस्रोतांद्वारे ६० पदे अशा एकूण १६४ पदांना मान्यता देण्यात आली आहे. मनुष्यबळ तसेच कार्यालयीन खर्चासाठी ५८ कोटी ९ हजार रुपयेही मंजूर करण्यात आले आहेत.