अकोला ः ‘महाबीज’चे (Mahabeej) अध्यक्ष तथा राज्याचे प्रधान सचिव (कृषी) एकनाथ डवले (Eknath Dawale) यांनी पैलपाडा येथील महाबीजच्या ६० एकरांवरील संशोधन प्रक्षेत्रात ‘महाबीज सेंटर ऑफ एक्सलन्स’ (Mahabeej Center Of Excellence)येथे भेट दिली. येथे सुरू असलेल्या संशोधन विषयक कामाबाबत संशोधन पथकाचे कौतुक केले.

महाराष्ट्र राज्य बियाणे महामंडळाच्या (महाबीज) संचालक मंडळाची बैठक डवले यांच्या उपस्थितीत झाली. या वेळी महाबीजचे नवनियुक्त संचालक वल्लभराव देशमुख, डॉ. रणजित सपकाळ, व्यवस्थापकीय संचालक संतोष आळसे, प्रशासन महाव्यवस्थापक डॉ. प्रफुल्ल लहाने आदी उपस्थित होते.

डवले यांनी या वेळी महाबीजच्या संशोधित वाणांची पाहणी केली. जैविक खते प्रयोगशाळा, महाबीज रोपवाटिका तसेच संशोधन कामकाजाचा आढावा घेऊन संबंधितांना मार्गदर्शक सूचना केल्या.

दुपारच्या सत्रात संचालक मंडळाच्या सभेत महाबीज व शेतकरी हिताचे निर्णय घेण्यात आले. रिक्त असलेल्या महाव्यवस्थापक या पदासाठी पात्र उमेदवारांची निवड समितीसमोर मुलाखत घेतली. यात उत्पादन महाव्यवस्थापक विवेक ठाकरे आणि प्रशांत पागृत यांची प्रक्रिया महाव्यवस्थापक या पदावर निवड जाहीर करण्यात आली.