Sangli News : खासगी दूध संघ असोसिएशनच्या बैठकीत गाईच्या दूधदरात प्रतिलिटरला एक ते दोन रुपये कपात केली जाणार आहे. येत्या दोन दिवसांत प्रतिलिटरला किती रुपयांची कपात होईल, हे निश्चित होईल. म्हशीच्या दूधदरात वाढ करण्याचा निर्णय बैठकीत घेण्यात आला आहे. या निर्णयाची अंमलबजावणी १ ऑक्टोबर २०२३ पासून केली जाणार आहे.

खासगी दूध संघाच्या बैठकीस चितळे डेअरीचे श्रीपाद चितळे, थोटे डेअरीचे शीतल थोटे, भारती डेअरीचे किरीट मेहता, राजारामबापू दूध संघाचे अध्यक्ष नेताजी पाटील, विनायकराव पाटील, तसेच विराज दूध डेअरी (विटा), रामविश्वास दूध डेअरी (सांगली), विटा डेअरी (मिरज) यांचे प्रतिनिधी उपस्थित होते. म्हशीचा दूध दर प्रतिलिटर साडेसहा स्निग्धांशाला दीड रुपयांनी वाढविला आहे. गायीच्या दूधदरात एक ते दोन रुपये प्रतिलिटर कपात केली आहे. हे दूध सरसकट ३३ रुपयांनी खरेदी करण्यात येणार आहे. राज्य सरकारने म्हशीच्या दूधदरात प्रति लिटर दोन रुपये वाढ करण्याचा नुकताच निर्णय घेतला. त्यापासून खासगी दूध संघानेही दर वाढविण्याचा निर्णय घेतला आहे.

सांगली जिल्ह्यात रोज सुमारे १३ लाख ५० हजार लिटर दूध संकलन होते. यात म्हशीच्या दुधाचे २५ ते ३० टक्के, तर गायीच्या दुधाचा ७० ते ७५ टक्के समावेश आहे.