Solapur ST News : राज्य सरकारने राज्य परिवहन महामंडळातील २०१९ पासून प्रलंबित असलेल्या ३३६ एसटी कर्मचाऱ्यांना एकाच महिन्यात नियुक्त्या दिल्या असून, हा निर्णय घेऊन सरकारने या तरुणांना दिलासा दिला आहे. एसटी महामंडळात २०१९ पासून कर्मचारी भरतीची प्रक्रिया रेंगाळली होती.

प्रशिक्षणानंतरही सोलापूर विभागातील युवकांना तीन वेळा मेडिकल चाचणी द्यावी लागली होती. या प्रश्नावर सकल मराठा समाजाच्या वतीने आंदोलन करण्यात आले होते, तर माजी खासदार छत्रपती संभाजीराजे यांनीही या कर्मचाऱ्यांच्या नियुक्त्यांचा प्रश्‍न लावून धरला होता.

त्यामुळे मराठा समाजासह इतर सर्वच समाजातील ३३६ जणांना चार टप्प्यांत नियुक्त्या मिळाल्या आहेत.

चालक, वाहक दोन्हीही भूमिका बजावणार

राज्यातील शिंदे-फडणवीस सरकारने काळाची गरज ओळखून, एसटीच्या कर्मचाऱ्यांना मल्टिटास्क ट्रेनिंग दिलेय.

त्यामुळे नव्याने नियुक्त झालेले हे सर्व ३३६ कर्मचारी चालक आणि वाहक अशा दोन्ही भूमिका पार पाडणार आहेत. त्यामुळे एसटीची कार्यक्षमता वाढणार असून उत्पन्नवाढीलाही चालना मिळणार आहे, असे सांगण्यात आले.