Jamkhed News : अतिवृष्टीने पिकांचे झालेल्या नुकसानीचे गेल्या वर्षी पंचनामे झाले, मात्र आज आठ महिन्यांनंतरही जामखेड तालुक्यातील शेतकऱ्यांना नुकसान भरपाईपोटी २२ कोटींची मदत मिळण्याऐवजी केवळ ८ कोटी ७० लाख रुपयांचे अनुदान मंजूर झाल्याने तालुक्यातील अनेक शेतकरी वंचित राहणार आहेत.

यासंदर्भात २७ मार्च २०२३ रोजी राज्य सरकारच्या महसूल व वन विभागाने परिपत्रक काढून, अतिवृष्टीमध्ये झालेल्या नुकसानीपोटी मदत देण्याच्या निकषात बदल केला. या परिपत्रकानुसार नुकसान भरपाईपोटी मिळणारी मदत निम्म्याहून अधिक कमी झाली.

या परिपत्रकाला धरून, महसूल व वन विभागाने २२ जून २०२३ रोजी नवीन परिपत्रक काढून २७ मार्च २०२३ च्या परिपत्रकानुसार अनुदानाची सुधारित मागणी करण्याचे आदेश महसूल प्रशासनाला दिले. या सुधारित मागणीनुसार जामखेड तालुक्याची मागणी १० कोटी ४० लाख रुपयांची होती. मात्र प्रत्यक्षात ८ कोटी ७० लाख रुपये मंजूर झाले आहेत.\

अशी केली होती अनुदानाची मागणी

याप्रकरणी पिकांच्या नुकसान भरपाई पोटी शासनाकडे जिरायत पिकांसाठी १६ कोटी ३१ लाख, तर बागायत पिकांसाठी ५ कोटी ४१ लाख अशी एकूण २२ कोटी रुपये सरकारी अनुदानाची मागणी करण्यात आली होती.

अंशतः पडझड झालेल्या ११ घरांसाठी नवीन निकषाप्रमाणे १ लाख ६५ हजाराच्या अनुदानाची मागणी करण्यात आली होती. एका बैलाचा वीज पडून मृत्यू झाल्याने त्यासाठी ३० हजार रुपये अनुदान मागणी करण्यात आली होती.

दृष्टिक्षेपात...

जामखेडमधील ८७ महसूल गावात पीक नुकसानीचे पंचनामे

२३ हजार ६५६ अतिवृष्टीग्रस्त शेतकऱ्यांचे नुकसानीचे पंचनामे

१३ हजार ९९५ हेक्टर क्षेत्रावरील पिकांचे अतिवृष्टीमुळे नुकसान

२२ कोटी रुपये अनुदानाची मागणी