धाराशिव ः जिल्ह्यात आठ बाजार समितीच्या निवडणुकांचा (APMC Election) बिगूल वाजला असून सोमवारपासून उमेदवारी अर्ज भरण्यास सुरवात झाली आहे.

आतापर्यंत जिल्ह्यात १९३ उमेदवारी (Nomination) अर्ज दाखल करण्यात आले आहेत. पुढील दोन दिवसात खऱ्या अर्थाने अर्ज भरण्यासाठी झुंबड उडण्याची शक्यता आहे.

सध्यातरी महाविकास आघाडीची बोलणी सुरू असल्याचे सांगितले जात असले तरी माघारीच्या दिवसापर्यंत ही चर्चा सुरूच राहणार, असे सांगितले जात आहे. भाजपने मात्र सवतासुभा मांडला असून ज्या ठिकाणी भाजपची शक्ती कमी आहे. त्या बाजारसमितीमध्ये त्यांनी शिंदे गटाला बळ देण्याची भूमिका स्वीकारली असल्याचे सांगितले जाते.

बाजारसमितीच्या निवडणुकीसाठी जिल्ह्यामध्ये अर्ज भरण्याची प्रक्रिया सुरू झाली असून शनिवार व रविवारी सुट्टीचे दिवस असल्याने आता सोमवार व मंगळवार हे दोन दिवस शिल्लक राहिले आहेत. या दोन दिवसात अर्ज भरणाऱ्यांची संख्या मोठ्या प्रमाणावर वाढण्याची शक्यता व्यक्त होत आहे.

प्रत्येकी १८ जागेसाठी होत असलेल्या निवडणुकीसाठी आतापर्यंत साधारण १९३ अर्ज दाखल झाले. सर्वाधिक अर्ज उमरगा व कळंब बाजारसमितीमध्ये आले आहेत. जिल्ह्यात १३ हजार ४४१ एवढ्या मतदारांना आठ बाजारसमितीमध्ये मतदानाचा अधिकार प्राप्त झाला आहे.

अर्ज दाखल झालेल्या समिती

परंडा २५

कळंब ३९

मुरूम १२

धाराशिव २१

तुळजापूर १५

भूम १७

वाशी २५

उमरगा ३९

एकूण १९३