धुळे ः शिंदखेडा तालुक्यातील दहा मंडळाधिकारी कार्यालये व निवासस्थान, तसेच ५० तलाठी कार्यालयांच्या (Talathi Office) बांधकामासाठी १९ कोटींच्या निधीची (Government Fund) मागणी माजी मंत्री तथा आमदार जयकुमार रावल यांनी केली होती. तिची पूर्तता महसूलमंत्री राधाकृष्ण विखे-पाटील (Radhakrushn Vikhe Patil) यांनी केली असून, याकामी १९ कोटींच्या निधीला त्यांनी प्रशासकीय मंजुरी दिली आहे.

शिंदखेडा तालुक्यात मंडळाधिकारी कार्यालय व तलाठी कार्यालये ही ग्रामपंचायतीच्या कार्यालयात किंवा खासगी जागेत सुरू आहेत. त्यांना स्वतंत्र कार्यालये व्हावीत यासाठी आमदार रावल यांनी महसूलमंत्री विखे-पाटील यांच्याकडे निधीची मागणी केली होती. तिची दखल घेत महसूलमंत्र्यांनी निधीसह कामांसाठी प्रशासकीय मंजुरी दिली आहे.

तालुक्यातील सर्व मंडळाधिकारी कार्यालये व सजेच्या ठिकाणी नवी तलाठी कार्यालये उभारली जाणार असून, मंडळाधिकारी कार्यालयासाठी प्रत्येकी ४० लाख रुपये असा एकूण सरासरी चार कोटींचा निधी, तर तलाठी कार्यालयासाठी प्रत्येकी ३० लाख रुपये, असा एकूण १५ कोटींचा निधी खर्च होईल, असे आमदार रावल यांनी सांगितले. पाठपुराव्यामुळे तालुक्यात तलाठी, मंडळाधिकाऱ्यांना ही चांगली सोय होणार असल्याचे ते म्हणाले.

अशी होतील कार्यालये...

या गावांना होणार मंडळाधिकारी कार्यालय ः शिंदखेडा, दोंडाईचा,चिमठाणे, वर्शी, विरदेल, खलाणे, नरडाणा, बेटावद, विखरण, शेवाळे. या गावांना होणार तलाठी कार्यालये ः मालपूर, रामी, टाकरखेडा, निमगूळ, झोटवाडे, कुरकवाडे, बाह्मणे, कोडदे, खर्दे बुद्रुक, दाऊळ, हातनूर, कर्ले, देगाव मेथी, दिवी, दभाषी, होळ, वायपूर, चिरणे, महाळपूर, वालखेडा, अजंदे बुद्रुक, पढावद, मुडावद, म्हळसर, अमळथे, लोहगाव, तामथरे, दराणे, सवाई मुकटी, डांगुर्णे, पाटण, वरपाडे, वरसुस, वरूळ, भडणे, आरावे, कंचनपूर, वाघाडी, वारूड, गोराणे, कमखेडा, जातोडे, पाष्टे, चिलाणे, रंजाणे, चौगाव बुद्रुक, सुकवद, दत्ताणे, डाबली-धांदरणे.