नगर ः कृषी सेवा केंद्र व लोकसहभागातून संगमनेर उपविभागात शून्य खर्चाचे दीड हजार वनराई बंधारे उभारण्याचे काम युद्धपातळीवर सुरू आहे. प्रत्येक कृषी सहायकाने १० बंधारे उभारण्याचे नियोजन केले आहे, अशी माहिती संगमनेरचे उपविभागीय कृषी अधिकारी सुधाकर बोराळे यांनी दिली. संगमनेर तालुक्यात बंधारे उभारण्याची मोहीम जोरात सुरू आहे. कृषी विभागासह शेतकऱ्यांचा त्याबाबत चांगला प्रतिसाद मिळत आहे असे संगमनेरचे तालुका कृषी प्रवीण गोसावी यांनी सांगितले.

नगर जिल्ह्यात दर वर्षी पावसाळ्याच्या शेवटी वाहत्या झालेल्या ओढ्या-नाल्यांचे पाणी अडवून त्यावर सोप्या तंत्राचा वापर करून बांधलेल्या वनराई बंधाऱ्यांमुळे पाणी साचून सिंचन, जमिनीचा ओलावा टिकवणे, तसेच उन्हाळ्यात उद्‍भवणाऱ्या पाणीटंचाईवरही मात करण्यासाठी संगमनेर उपविभागात ही मोहीम आखली आहे. जलसंधारणास मदतीसह रब्बी हंगामासाठी पिकांना व पशूपक्ष्यांसाठी पाणीसाठे उपलब्ध होऊन विहिरींची पाणीपातळी वाढण्यासाठी व उत्पन्नात भर घालणाऱ्या या उपक्रमाला शेतकरी वर्गाचा भरघोस प्रतिसाद मिळत आहे.

उपविभागात स्थानिक शेतकरी, कृषी सेवा केंद्र संघटना, कृषी सेवक व कर्मचाऱ्यांच्या श्रमदानातून ही मोहीम यशस्वीरीत्या राबवली जात आहे. लोकसहभागातून राबवलेल्या या योजनेमुळे शासनाची प्रतिमा उंचावण्यास मदत होते. १० नोव्हेंबर रोजी कामाला सुरुवात झाली असून, उपविभागातील चार तालुक्यांतील प्रस्तावित दीड हजार बंधाऱ्यांपैकी ९५० बंधारे पूर्ण झाले आहेत, असे उपविभागीय कृषी अधिकारी सुधाकर बोराळे यांनी सांगितले.