Dharashiv News: वेळा अमावास्या सणानिमित्त शुक्रवारी (ता. १९) शेतकरी कुटुंब, त्यांचे मित्रपरिवार व नातेवाइकांच्या गर्दीने शेतशिवार फुलून गेले. दुसरीकडे शहरे, गावांमध्ये शुकशुकाट होता. शेतात कोप घालून पांडवांची पूजा करण्यासोबत वनभोजनासाठी आलेल्यांच्या स्वागतासाठी शेतकऱ्यांची सकाळपासून धावपळ सुरू होती..कर्नाटक सीमाभागासह लातूर व धाराशिव जिल्ह्यांत वेळा अमावास्या सण शेतकरी मोठ्या उत्साहाने साजरा करतात. यंदा खरिपात अतिवृष्टी झाली तरी उशिरापर्यंत सुरू राहिलेल्या पावसाने रब्बी हंगामातील पिके बहरात आहे. यामुळे वेळा अमावास्या सणाचा शेतकऱ्यांमध्ये उत्साह आहे. गुरुवारी (ता. १८) सायंकाळपासूनच सणासाठी शहरातील शेतकरी कुटुंबांनी गावाकडे जाण्यास सुरुवात केली. यामुळे बस स्थानकात प्रवाशांची तोबा गर्दी झाली..Vela Amavasya: वेळा अमावास्या सणाचा उत्साह.एसटी महामंडळाने दुपटीने बसगाड्या उपलब्ध करूनही गर्दी आटोक्यात आली नाही. मिळेल त्या वाहनाने गाव गाठण्याचे प्रयत्न रात्री उशिरापर्यंत सुरू होते. काही शेतकरी कुटुंब व त्यांचे मित्र परिवार शुक्रवारी सकाळी शिवाराकडे निघाले. यामुळे गावाकडे जाणारे रस्ते वाहनांनी फुलून गेले..दुसरीकडे शेतकरी कुटुंबांनी सकाळपासूनच शेतात कडब्याची कोप घालून पांडवांची पूजा केली. त्यानंतर आंबिल टाकून काळ्या आईची पूजा केली. सर्वच भागात पूजा व त्याची पद्धत सारखी नाही. त्या त्या भागातील परंपरेनुसार पूजा सुरू होत्या. शेतकरी व कुटुंबातील महिला पूजेमध्ये व्यस्त असतानाच मित्र परिवार व नातेवाइकांचे आगमन झाले..Vela Amavasya: वेळा अमावास्येसाठी शिवारे गजबजली.त्यांना भोजन देण्याचे काम दिवसभर सुरू होते. गुरुवारी शेतकरी कुटुंब तर शुक्रवारी मित्र परिवार व नातेवाइकांची शेतशिवाराकडे जाण्याची धावपळ सुरू होती. खेड्यातील रस्त्यात वाहनांच्या रांगा लागल्या तर बस स्थानकात प्रवाशांची गर्दी होती. शहरातून गावाकडे जाणाऱ्या वाहनांमुळे वाहतुकीची कोंडी झाली होती. शेतशिवार नागरिकांच्या गर्दीने फुलल्याने शहराच्या ठिकाणी शुकशुकाट होता..आंबिल उंड्याची परंपरा कायमकाळानुरूप अनेक नवनवीन पदार्थ आले तरी वेळा अमावास्या सणानिमित्त पारंपरिक पदार्थांची क्रेझ कायमच होती. यात ज्वारी व बाजरीचे उंडे व आंबिल तसेच भजीची चव न्यारीच होती. धपाटे, खीर, तिळाची पोळी, विविध प्रकारच्या चटण्या आदी पदार्थांवर नागरिक व शेतकरी कुटुंब ताव मारताना दिसली. वनभोजनानंतर झाडाच्या सावलीत अंताक्षरीचे खेळ सुरू होते. निसर्गाच्या सान्निध्यात फोटो काढून व व्हिडिओ तयार करून सोशल मीडियावर टाकण्यासाठीही तरुणाईची धावपळ सुरू होती..ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
