Maharashtra Culture : नांदेड शंकरपटाच्या मैदानात दमदार कामगिरी करत परिसरात वेगळी ओळख निर्माण करणाऱ्या ‘मल्हार’ या बैलाची तब्बल साडेपाच लाख रुपयांना विक्री झाली. लाडक्या बैलाला निरोप देताना मालक युवा शेतकरी आशिष रुस्तुमराव मस्के यांनी बँड पथकाच्या तालात त्याची मिरवणूक काढली. विक्रीपूर्वी काढण्यात आलेल्या या अनोख्या निरोपाच्या मिरवणुकीने बरडशेवाळा (ता. हदगाव) परिसराचे लक्ष वेधून घेतले..बरडशेवाळा येथील अल्पभूधारक युवा शेतकरी आशिष मस्के यांचा मुख्य व्यवसाय शेती आहे. शेतीवरील अवलंबित्व कमी करण्यासाठी त्यांनी दुग्ध व्यवसायाची जोड दिली आहे. शेतात मोठे शेड उभारून विविध जातींच्या म्हशींचे संगोपन करत त्यांनी दुग्ध व्यवसाय सुरू केला. तसेच गावात दूध डेअरीही सुरू केली आहे. शेती, दुग्ध व्यवसाय आणि शंकरपटाचा छंद यामुळे मस्के कुटुंबाची परिसरात वेगळी ओळख निर्माण झाली आहे..Agriculture Success Story: संघर्षातून फुलशेतीचा ध्यास, मजुरीचा थांबला प्रवास.मस्के कुटुंबाला शंकरपटाची परंपरागत आवड आहे. आशिष मस्के यांचे आजोबा स्वर्गीय माणिकराव मस्के आणि वडील रुस्तुमराव मस्के यांनाही शंकरपटाचा छंद होता. याच छंदातून आशिष यांनी सुमारे दीड वर्षापूर्वी ‘मल्हार’ हा शंकरपटाचा बैल घेतला. अल्पावधीतच मल्हारने विविध शंकरपटांच्या मैदानात उल्लेखनीय कामगिरी करत स्वतंत्र ओळख निर्माण केली..वेग, ताकद आणि सातत्यपूर्ण कामगिरीच्या जोरावर मल्हारने अनेक मैदानांत बाजी मारली. त्यामुळे शंकरपटाच्या शौकिनांमध्ये त्याची चर्चा होऊ लागली. त्याच्या कामगिरीमुळे मालक आशिष मस्के यांचेही नाव परिसरात गाजले. मल्हार हा केवळ शंकरपटातील बैल न राहता मस्के कुटुंबातील जिव्हाळ्याचा सदस्य बनला होता..Maize Farming: मका पिकात ओळख मिळवतेय गाव शेलवड.दरम्यान, काही कारणांमुळे मस्के यांनी मल्हारची विक्री करण्याचा निर्णय घेतला. शंकरपटातील दमदार कामगिरीमुळे या बैलाला चांगली मागणी मिळाली. अखेर त्याची साडेपाच लाख रुपयांना विक्री झाली. विक्रीची माहिती परिसरात पसरताच शंकरपट रसिकांमध्येही त्याची चर्चा सुरू झाली..मल्हारला निरोप देण्याचा प्रसंग मस्के कुटुंबासाठी भावनिक ठरला. दीड वर्षांच्या सहवासात जीवापाड जपलेल्या बैलाला सजवून बँड पथकाच्या तालात मिरवणूक काढण्यात आली. यावेळी आशिष मस्के यांच्यासह कुटुंबीय आणि ग्रामस्थ भावूक झाले. मल्हारला निरोप देण्यासाठी ग्रामस्थांनीही मोठी गर्दी केली होती. शंकरपटाच्या मैदानात दमदार कामगिरीने नाव गाजविणाऱ्या मल्हारचा निरोप पाहण्यासाठी परिसरातील शंकरपट रसिक मोठ्या संख्येने उपस्थित होते. सजविलेला बैल, बँडचा गजर आणि भावूक झालेले मालक-कुटुंबीय असे चित्र यावेळी पाहायला मिळाले. साडेपाच लाख रुपयांना झालेली विक्री आणि बँडच्या तालात लाडक्या बैलाला दिलेला निरोप हा परिसरात चर्चेचा विषय ठरला आहे..ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
