Maharashtra Monsoon Political Debate: मिसिंग लिंकवर दरड कोसळून बीम पडल्याने या मार्गावरील वाहतूक १८ तास बंद करावी लागली. पावसाने मुंबई ठप्प झाली. मॅनहोलमध्ये पडून नागरिक मृत्युमुखी पडत होते. त्या वेळी उपमुख्यमंत्री एकनाथ शिंदे गायब होते. त्यामुळे या सगळ्या विभागांच्या अकार्यक्षमतेची पाठराखण करण्याची जबाबदारी मुख्यमंत्र्यांवर आली. या वरवरच्या घटना नसून सरकारमधील सुप्त संघर्ष आहे..गेल्या दहा-पंधरा वर्षांमध्ये पायाभूत सुविधा, विकास यासारख्या शब्दांचा जोरदार भडिमार सुरू आहे. राज्यभर उकरलेले रस्ते आणि त्यात अडकलेले प्रवासी असे चित्र पाहायला मिळत आहे. एका बाजूला केंद्र सरकारच्या रस्ते वाहतूक आणि दळणवळण विभागाचे म्हणजेच नितीन गडकरी यांच्या संकल्पनेतील रस्ते चर्चेत आहेत. दुसरीकडे महाराष्ट्र रस्ते विकास महामंडळाने म्हणजे उपमुख्यमंत्री एकनाथ शिंदे यांच्या विभागाने हातात घेतलेले महाकाय प्रकल्प यामुळे राज्यात विकास कामांचा डोंगर उभा केला असा दावा सत्ताधारी करीत आहेत. या सगळ्या विकासकामांचे श्रेय घ्यायचे कोणी यातून आता सरकारमध्ये सुरू असलेला सुप्त संघर्ष तुंबलेल्या मुंबईमुळे उघड्यावर आला आहे..इशारे अन् धमक्याराज्य सरकारच्या विविध प्रकल्पांचा डोलारा किती भुसभुशीत पायावर उभा आहे, याचे प्रत्यंतर अवघ्या तीन दिवसांच्या जोरदार पावसाने आले. अवघ्या दोन महिन्यांपूर्वी सुरू झालेला मुंबई-पुणे महामार्गावरील कनेक्टिंग लिंकवर दरड कोसळून बीम पडले. हा केवळ अपघात नाही तर सध्या सुरू असलेल्या कामांच्या दर्जाचा भेसूर चेहरा आहे. या अपघातामुळे पुणे - मुंबईसारख्या दोन मेट्रो शहरांना जोडणारा प्रमुख महामार्ग १८ तासांहून अधिक काळ बंद राहतो, ही राज्य सरकारची नामुष्की आहे. त्यावर कुणी बोलले तर तो महाराष्ट्राचा अपमान कसा झाला, हे कळायला मार्ग नाही..Maharashtra Politics: नेमिची येते अधिवेशन.मुख्यमंत्री देवेंद्र फडणवीस यांनी विधान भवनासारख्या संविधानिक ठिकाणाचा वापर धमक्या आणि इशाऱ्यासाठी करणे राज्याच्या आजवरच्या लोकशाही परंपरेला मोठा डाग आहे. ज्या व्यवस्थेमध्ये ट्रोलिंगची यंत्रणा भाजपच्या काळात उभी राहिली त्याच काळामध्ये मुख्यमंत्र्यांना त्याचा सामना करावा लागत आहे, हाही योगायोगच म्हणावा! अख्खा महाराष्ट्र ताब्यात असताना आणि प्रचंड बहुमत असतानाही मुख्यमंत्र्यांना विधानसभेतून जाहीर धमक्या द्याव्या लागतात. भाड्याचे तट्टू, कुत्रे विचारत नाही तरीही ट्रोल करतात, महाराष्ट्राची बदनामी कराल तर बघून घेईन, अशी भाषा मुख्यमंत्र्यांना शोभणारी नाही, तरीही त्यांनी ती वापरली..भाजपचे आणि राज्य सरकारचे संकटमोचक म्हणून धावणारे गिरीश महाजन यांच्याकडे आपत्ती व्यवस्थापन विभाग आहे. राज्यभरात झालेल्या अतिवृष्टीने महाजन यांच्या कारभाराचीही पोलखोल केली आहे. त्यामुळे चिखलात अडकलेली गाडी काढण्यासारखे स्टंट त्यांना करावे लागले. बाकी जनता भलेही विकासाच्या खड्ड्यात का पडेना! जगातील सातहून अधिक देशांचे तंत्रज्ञान वापरलेले हे बोगदे पहिल्याच पावसात अशा पद्धतीने बंद ठेवायला लागणे ही राज्य सरकारची मोठी नामुश्की होती. अशा घटनांमधून धडा घेऊन काम करणाऱ्या कंपन्यांना चाप लावण्याची संधी राज्य सरकारला होती. मात्र सरकार आपल्याच धुंदीत आहे..या संपूर्ण विषयांत राज्य सरकारमध्ये सुरू असलेल्या कुरघोड्या आणि शहकाटशहाचे राजकारण पाहायला मिळाले. मुळात सार्वजनिक बांधकाम विभाग (सार्वजनिक उपक्रम) हा उपमुख्यमंत्री एकनाथ शिंदे यांच्याकडे आहे. ‘इन्फ्रा मॅन’ म्हणून कोणाची प्रतिमा मोठी होते, यासाठी सध्या मुख्यमंत्री फडणवीस आणि उपमुख्यमंत्री शिंदे यांच्यात चढाओढ आहे. आपल्या नेतृत्वाखाली महायुतीने बहुमत मिळविले. त्यामुळे मुख्यमंत्रिपदावर दावा करणाऱ्या एकनाथ शिंदेंना भाजपच्या संख्याबळापुढे हात चोळत बसावे लागले..Maharashtra Politics: लढाई अस्तित्वाची अन् सत्तेसाठीची.देशभरामध्ये गाजावाजा केलेल्या मिसिंग लिंकवर अपघात होऊनही शिंदे ना सभागृहात आले ना माध्यमांसमोर बोलले. मिसिंग लिंकवर झालेल्या अपघातानंतर समाजमाध्यमातून सरकारची पुरती नाचक्की झाल्यानंतर या प्रकल्पाशी त्यांचा संबंध नसतानाही सार्वजनिक बांधकाममंत्री शिवेंद्रराजे भोसले यांनी जाऊन पाहणी केली. पावसाने मुंबई तुंबली होती. मुंबईसह ठाण्यातील झाडे पडून माणसे मरत होती. नालेसफाईचा दावा करणाऱ्या महापालिकेचे पितळ उघडे पडत होते, मॅनहोलमध्ये माणसे पडत होती तरीही या नगर विकास विभागाचे मंत्री असलेले उपमुख्यमंत्री शिंदे तोंडातून ब्र काढायला तयार नव्हते..शिंदेंची रणनीती, फडणवीसांची कोंडीउपमुख्यमंत्री शिंदे यांच्याकडे नगर विकास आणि सार्वजनिक बांधकाम खाते असूनही त्यांनी या संकटाकडे का दुर्लक्ष केले, हा मूळ प्रश्न आहे. एरवी आपत्ती व्यवस्थापनाचे आपणच जनक आहोत, अशा आविर्भावात ते वावरत असतात. सरकारची पुरती नाचक्की झाल्यानंतर मुख्यमंत्र्यांना शिंदे यांच्या दोन्ही विभागांची उत्तरे द्यावी लागली. राज्य सरकारमध्ये सुरू असलेल्या छुप्या संघर्षाचे हे एक उदाहरण आहे. माझ्या विभागात केवळ माझेच चालणार, असे एकनाथ शिंदेंना वाटते, मात्र तसे होत नाही. महाराष्ट्र रस्ते विकास महामंडळ कडून राज्यात सुरू असलेल्या अनेक प्रकल्पांमध्ये मुख्यमंत्र्यांचा वरचष्मा आहे..मिसिंग लिंक उभा करण्यात आपला वाटा असल्याचे एकनाथ शिंदे यांना वाटते. त्याचे संपूर्ण श्रेय मुख्यमंत्री देवेंद्र फडणवीस यांनी घेतले. गेल्या चार वर्षांपासून उपमुख्यमंत्री एकनाथ शिंदे मिसिंग लिंक आणि अन्य प्रकल्पांची नावे घेऊन पाठ थोपटून घेत होते. किंबहुना, मिसिंग लिंक हा त्यांचा ड्रीम प्रोजेक्ट होता. उद्घाटनालाच या मिसिंग लिंकचे नाव बदलून मुख्यमंत्री देवेंद्र फडणवीस यांनी ‘कनेक्टिंग लिंक’ करत संपूर्ण प्रकल्पाचे श्रेय घेतले. त्यामुळे नाराज असलेल्या शिंदे यांनी यापुढे याबाबत जे काय घडेल ते तुम्ही पाहा असेच जणू त्यांच्या कृतीतून दाखवून दिले आहे..आता टेस्टिंग थांबवावीमुख्यमंत्री देवेंद्र फडणवीस यांच्यासारखा मुरब्बी राजकारणी जर या प्रकल्पाबाबत उत्तरे देत असताना उथळपणे काही वक्तव्य करत असेल तर ट्रोल होणारच. कमानीवर दरड पडण्याआधी दोन दिवस या बोगद्यामध्ये खड्डे दिसत होते. त्यावरूनही त्यांनी संताप व्यक्त करत हा पहिला पाऊस आहे आणि त्यामध्ये टेस्टिंग होत असते अशा प्रकारचे वक्तव्य केले. त्यानंतर पडलेली दरड ही बीमवर पडली आहे. त्यामुळे या बोगद्याला काही झाले नाही, असे सांगून त्यांनी वेळ मारून देण्याचा प्रयत्न केला. केवळ बोगदा तयार केला आणि वाहतूक सुरू झाली म्हणजे जबाबदारी संपली असे होत नाही. वरून येणारी दरड जर एखाद्या वाहनावर पडली असती तर कित्येकांना जिवाला मुकावे लागले असते. विकासाचे डोंगर उभे करताना आता तरी माणसांच्या जिवांचा विचार करावा आणि पावसामध्ये प्रकल्पांचे टेस्टिंगही राज्य सरकारने थांबवावे.९२८४१६९६३४(लेखक ‘सकाळ ॲग्रोवन’चे मुंबई प्रतिनिधी आहेत.).ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
