Monsoon Rain Forecast: जून महिन्यात देशभरात पावसाने दडी दिल्यानंतर जुलै महिन्यात देखील पावसाचे प्रमाण कमीच राहण्याची शक्यता अधिक आहे. यंदाच्या जुलै महिन्यात सरासरीपेक्षा कमी पावसाचा (९४ टक्क्यांपेक्षा कमी) अंदाज हवामान विभागाने वर्तविला आहे. विदर्भ वगळता उर्वरित महाराष्ट्रात कमी पावसाचा अंदाज वर्तविण्यात आला आहे..हवामान विभागाचे महासंचालक डॉ. मृत्युंजय मोहपात्रा यांनी मंगळवारी (ता. ३०) जुलै महिन्यातील पावसाचा अंदाज जाहीर केला. यात देशाच्या बहुतांशी भागात सरासरीपेक्षा कमी पावसाची शक्यता अधिक आहे. देशाच्या उत्तरेकडील लडाखसह ईशान्य भारतातील राज्ये, मध्य भारत तसेच दक्षिण भारताच्या पूर्वेकडील भागात सरासरी ते सरासरीपेक्षा अधिक पावसाची शक्यता अधिक असल्याचे हवामान विभागाने म्हटले आहे. १९७१ ते २०२० या कालावधीतील नोंदीनुसार जुलै महिन्यात देशात २८०.४ मिलिमीटर पाऊस पडतो..July Rainfall: जुलै महिन्यातही पाऊस कमीच.दरम्यान, देशाच्या बहुतांश भागात कमाल आणि किमान तापमान सरासरीपेक्षा कमी राहण्याची शक्यता आहे. गुजरातच्या पश्चिम भागात कमाल तापमान सरासरी ते सरासरीपेक्षा कमी राहण्याची शक्यता अधिक आहे. तसेच गुजरातसह उत्तर महाराष्ट्र आणि पश्चिम विदर्भात किमान तापमान सरासरी इतके राहण्याची शक्यता अधिक आहे..जगभरातील महासागराच्या समुद्राच्या पाण्याचे तापमान सध्या वाढले असून, अटलांटिक आणि हिंद महासागरात तापमान सरासरीच्या वर जात आहे. प्रशांत महासागराच्या विषुववृत्तीय भागात पाण्याच्या पृष्ठभागाचे तापमान चांगलेच वाढले असून, ‘एल-निनो’ची तीव्रता वाढू लागली आहे. मॉन्सून हंगामात एल-निनोची स्थिती तीव्र होत जाणार आहे. यातच इंडियन ओशन डायपोल (आयओडी) सध्या तटस्थ असून, मॉन्सूनच्या अखेरपर्यंत तटस्थ स्थिती कायम राहण्याची शक्यता आहे..राज्यात कमी पावसाचा अंदाजयंदा जून महिन्यातही राज्यात पावसाने दडी मारली. महिन्याच्या अखेरच्या आठवड्यात झालेल्या पावसाने काहीसा दिलासा दिला. मात्र अनेक ठिकाणी जोरदार पावसाची प्रतीक्षा कायम आहे. जुलै महिन्यात कोकण, मध्य महाराष्ट्र, मराठवाड्यात कमी पाऊस पडण्याची शक्यता अधिक आहे. तर विदर्भ आणि मराठवाड्याच्या पूर्वेकडील भागात सरासरी ते सरासरीपेक्षा अधिक पावसाची शक्यता अधिक असल्याचे हवामान विभागाने म्हटले आहे..Rain Update: मॉन्सूनचा प्रवास पुन्हा सुरु; कोकण, विदर्भात पावसाचा ऑरेंज अलर्ट.जूनमध्ये देशभरात पावसाची तूटएल-निनोचे सावट, नैॡत्य मोसमी वाऱ्यांचा अडखळत सुरू असलेला प्रवास, पावसाला पोषक प्रणालींचा अभाव यामुळे जून महिन्यात पावसाचे प्रमाण कमी राहिले. जूनमध्ये देशात साधारणपणे १६५.३ मिलिमीटर पाऊस पडतो. यंदा अवघा ९९.५ मिलिमीटर पावसाची नोंद होत सरासरीच्या तुलनेत अपुरे (उणे ४० टक्के) पर्जन्यमान झाल्याचे हवामान विभागाने म्हटले आहे. लडाखमध्ये सरासरीपेक्षा अधिक पाऊस झाला आहे. तर राजस्थान, पश्चिम बंगाल आणि आंध्र प्रदेशात सरासरीइतक्या पावसाची नोंद झाली असून, बहुतांश देशात पावसाची तूट असल्याचे दिसून आले आहे. जूनअखेर महाराष्ट्रात अवघा ११०.६ मिलिमीटर (उणे ४७ टक्के) पाऊस झाला आहे..जून महिन्यात साधारणपणे दोन ते तीन कमी दाब प्रणाली तयार होत असतात. मात्र यंदा एकही प्रणाली तयार झाली नाही. पश्चिम प्रशांत महासागरात चक्रीवादळे (टायफून) तयार होऊन त्यांचे अवशेष कमी दाब प्रणालीच्या स्वरूपात भारताकडे येतात. मात्र यंदा ही चक्रीवादळे जपान, चीनकडे सरकून गेली. यातील एकही प्रणाली भारताकडे आली नाही. यातच मॉन्सून हंगाम सुरू होताच प्रशांत महासागरात ‘एल-निनो’ स्थिती तयार झाली. यातच इंडियन ओशन डायपोल (आयओडी) तटस्थ राहिला. त्यामुळे १९०१ पासूनच्या जून महिन्यातील नोंदींचा विचार करता यंदाच्या जूनमध्ये पाचव्या क्रमांकाच्या कमी पावसाची नोंद झाली.डॉ. मृत्युंजय मोहपात्रा, महासंचालक, हवामान विभाग.ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
