Rhizome Fly Control: हळद पिकात कंदांची वाढ होत असताना कंदमाशीचा प्रादुर्भाव झाल्यास मोठे नुकसान होऊ शकते. या किडीच्या प्रादुर्भावामुळे उत्पादनात जवळपास ७० ते ८० टक्क्यांपर्यंत घट होऊ शकते. त्यामुळे कंदमाशीची लक्षणे ओळखून सुरुवातीपासूनच एकात्मिक पद्धतीने नियंत्रण करणे गरजेचे आहे..कंदमाशी ओळखायची कशी?कंदमाशीची प्रौढ माशी मोठ्या डासासारखी आणि काळ्या रंगाची असते. तिचे पाय शरीरापेक्षा लांब असून पायांच्या टोकांचा रंग पांढरा असतो. तिच्या पंखांवर राखाडी रंगाचे दोन ठिपके असतात. मादी खोडाच्या बुंध्याजवळ किंवा खोडाच्या सालीच्या आत अंडी घालते. अंड्यातून बाहेर पडलेल्या अळ्या खोडाच्या आत शिरून कंदांवर उपजीविका करतात..Turmeric Fertigation: ठिबकद्वारे हळदीला खत देताना आठवड्यानुसार करा नियोजन!.कंदमाशीमुळे काय नुकसान होते?अळी कंदामध्ये शिरल्यामुळे खोड आणि कंद मऊ होतात. त्यामध्ये पाणी साचते. अळीच्या विष्ठेमुळे तसेच साचलेल्या पाण्यामुळे पिथियम, फ्युजेरियम यांसारख्या बुरशीजन्य रोगांचा प्रादुर्भाव होऊ शकतो. परिणामी शेंडा आणि खोड सुकू लागते आणि कंद कुजतात. प्रादुर्भाव झालेल्या झाडाचा शेंडा हाताने ओढल्यास सहज बाहेर येतो आणि उग्र दुर्गंधीही जाणवते..लागवडीपासूनच काळजीकंदमाशीचा प्रादुर्भाव टाळण्यासाठी लागवडीसाठी निरोगी आणि टवटवीत डोळे असलेले कंद निवडावेत. लागवडीपूर्वी तसेच बेसल खत देताना शिफारशीनुसार जमिनीतून देण्यात येणाऱ्या कीटकनाशकांचा वापर करावा. जुने पीक काढल्यानंतर शेतात राहिलेले अवशेष आणि अळ्यांसहित सडलेले कंद नष्ट करावेत. तसेच बाळभरणी करताना उघडे पडलेले कंद व्यवस्थित मातीने झाकून घ्यावेत..Turmeric Yellow Leaves: हळद पिकाची पाने पिवळी पडण्यामागील कारणे आणि उपाय.एरंडी भरड्याचा सापळाकंदमाशीच्या प्रौढ अवस्थेचे नियंत्रण करण्यासाठी एरंडीच्या भरड्याचे आमिष वापरता येते. एक एकरासाठी सुमारे २ किलो एरंडीच्या बियांचा भरडा, २५ ते ४० ग्रॅम यीस्ट, ५० ग्रॅम डाळीचे पीठ आणि ८ लिटर पाणी एकत्र करावे. हे मिश्रण तीन ते चार दिवस सावलीत आंबवावे. सकाळी आणि संध्याकाळी काठीने मिश्रण ढवळावे..मिश्रणाला उग्र वास येऊ लागल्यानंतर त्यात तेवढेच पाणी मिसळून हे द्रावण एकरी ७ ते ८ प्लास्टिकच्या टोपल्यांमध्ये शेतात वेगवेगळ्या ठिकाणी ठेवावे. या वासामुळे प्रौढ कंदमाशा आकर्षित होऊन मिश्रणात पडतात आणि मरतात. त्यामुळे मादीची अंडी घालण्याची प्रक्रिया कमी होऊन पुढील प्रादुर्भावाला आळा बसण्यास मदत होते..प्रादुर्भाव दिसल्यास आळवणीहळदीचा शेंडा आणि पाने पिवळी पडून सुकू लागल्यास कंदमाशीचा प्रादुर्भाव तपासावा. प्रादुर्भाव आढळल्यास कोणत्याही एका कीटकनाशकाची प्रति १० लिटर पाण्यात मात्रा घेऊन मुळांजवळ आळवणी करावी.क्लोरोपायरीफॉस : २० मिलिक्विनॉलफॉस : २० मिलिडायमेथोएट : १५ मिलिप्रतिबंधात्मक उपाय म्हणून जुलै ते ऑगस्टदरम्यान १५ ते २० दिवसांच्या अंतराने एक ते दोन फवारण्या कराव्या..पीक फेरपालटएकदा कंदमाशीचा प्रादुर्भाव आढळल्यास पुन्हा हळदीची किंवा आले पिकाची लागवड करु नये. पिकाची फेरपालट करावी. हळद पीक काढल्यानंतर शेतात राहिलेल्या पिकांचे अवशेष, सडके कंद नष्ट करावेत. यामुळे माशीची जीवनसाखळी तुटून कीड नियंत्रणात मदत मिळते..डॉ. सिद्धनाथ शेंडेकर, संशोधन सहयोगी, आनुवंशशास्त्र आणि वनस्पती प्रजननशास्त्रनागेश दत्तगोंडे, संशोधन सहयोगी, वनस्पती जैवतंत्रज्ञान,रमेश देशमुख, तंत्र अधिकारीहळद संशोधन व प्रशिक्षण केंद्र वसमत, जि. हिंगोली.ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
