सचिन सातपुते : सकाळ वृत्तसेवा Fruit Farming Issues: यंदाच्या तीव्र उष्णतेचा फटका शेवगाव तालुक्यातील फळबागांना बसला असून उत्पादन घटण्याची भीती निर्माण झाली आहे. प्रखर उन्हापासून फळांचे संरक्षण करण्यासाठी शेतकरी शेडनेट, साड्या आणि विविध प्रकारच्या कापडी आच्छादनांचा वापर करीत आहेत. मात्र, त्यासाठी होणारा अतिरिक्त खर्च आणि बाजारातील असमाधानकारक दर यामुळे फळबाग उत्पादक आर्थिक अडचणीत सापडले आहेत..एप्रिल आणि मे महिन्यात तापमानाने उच्चांक गाठल्याने मोसंबी, संत्रा, चिकू, आंबा, नारळ, टरबूज, पपई, केळी तसेच डाळिंब बागांवर प्रतिकूल परिणाम झाला आहे. अनेक ठिकाणी फळांवर करपल्यासारखे डाग पडणे, फळगळ होणे आणि फळांचा दर्जा खालावणे अशा समस्या दिसून येत आहेत. त्यामुळे उत्पादनात घट होण्याची शक्यता व्यक्त केली जात आहे..Heatwave Impact: अंबासनमध्ये उष्माघातामुळे साडेतीन हजार कोंबड्यांचा मृत्यू.जायकवाडी धरणाच्या लाभक्षेत्रात सिंचन सुविधा उपलब्ध झाल्याने गेल्या काही वर्षांत तालुक्यात फळबागांचे क्षेत्र वाढले आहे. मात्र, यंदाच्या उष्णतेमुळे फळबागांचे संरक्षण हेच शेतकऱ्यांसमोर मोठे आव्हान बनले आहे. काही प्रगतशील शेतकऱ्यांनी लाखो रुपयांची गुंतवणूक करून शेडनेट आणि कापडी आच्छादनाचा वापर सुरू केला आहे. त्यामुळे उन्हाचा परिणाम काही प्रमाणात कमी होत असला, तरी सर्वसामान्य शेतकऱ्यांना हा खर्च परवडणारा नसल्याचे दिसून येत आहे..एकीकडे उत्पादन खर्चात सातत्याने वाढ होत असताना दुसरीकडे फळांना अपेक्षित बाजारभाव मिळत नसल्याने शेतकऱ्यांची कोंडी होत आहे. खत, कीडनाशके, मजुरी आणि सिंचन खर्च वाढला असून डिझेल-पेट्रोलच्या दरवाढीमुळे शेतीकामांचा खर्चही वाढला आहे. काही भागांत इंधनटंचाईचा परिणाम पाणीपुरवठा आणि शेती व्यवस्थापनावर होत असल्याने शेतकऱ्यांच्या अडचणी अधिकच वाढल्या आहेत..Heatwave Impact: उष्णतेमुळे केळी बागांची होरपळ.फळबाग उत्पादकांसाठी विशेष मदत जाहीर करून नुकसानग्रस्त शेतकऱ्यांना आर्थिक आधार द्यावा तसेच उत्पादनाला योग्य आणि हमीभाव मिळावा, यासाठी शासनाने ठोस उपाययोजना कराव्यात, अशी मागणी शेतकरी वर्गातून होत आहे..फळबागा उभ्या करण्यासाठी दरवर्षी मोठी गुंतवणूक करावी लागते. मात्र उत्पादनाला अपेक्षित दर मिळत नाही. हवामानातील बदल, वाढता उत्पादन खर्च आणि वारंवार येणारी संकटे यामुळे शेतकरी खचत आहे. शासनाने फळबाग उत्पादकांना योग्य दर मिळवून देण्यासाठी प्रभावी उपाययोजना कराव्यात; अन्यथा शेतकरी आर्थिकदृष्ट्या कोलमडून पडेल.- त्र्यंबक जाधव, शेतकरी, भाविनिमगाव.ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
