Latur News: लातूर जिल्ह्यातील मांजरा, तेरणा, घरणी व तावरजा नदीकाठासह अन्य ठिकाणच्या हजारो शेतकऱ्यांच्या जमिनी यंदाच्या अतिवृष्टीत खरडून गेल्या. यातील दोन हेक्टरपेक्षा जास्त जमिनीचे नुकसान झालेले तसेच पीक नुकसानीचे अनुदान मिळालेले शेतकरी अजूनही अनुदानापासून वंचित आहेत. .एकाच जमिनीच्या क्षेत्राला पीक नुकसानीचे अनुदान व खरडून गेल्यामुळे झालेल्या नुकसानीचे अनुदान, असा दुहेरी लाभ देण्यावरूनही प्रश्न निर्माण झाला आहे. यात पूरग्रस्त शेतकऱ्यांची संख्या मोठी असून अनुदानासाठी सरकारकडून कधी मार्ग काढला जाणार, असा प्रश्न शेतकरी उपस्थित करत आहेत..Flood Relief: जमीन खरडून गेलेल्या शेतकऱ्यांना पुढील आठवड्यापासून मदत.जिल्ह्यातील शेतकरी कधी दुष्काळ तर कधी अतिवृष्टी या अस्मानी संकटांचा सातत्याने सामना करत आहेत. ऑगस्ट व सप्टेंबरमध्ये झालेल्या मुसळधार पावसामुळे मांजरा, तेरणा व तावरजा नद्यांना अनेक वेळा मोठा पूर आला. लातूर, निलंगा, औसा, देवणी, शिरूर अनंतपाळ आदी तालुक्यांतील नदीकाठच्या तसेच जिल्ह्यातील अन्य ठिाकणी शेतात पाणी घुसून खरीप हंगामातील सोयाबीन, उडीद, मूग, तूर तसेच ऊस पीक पूर्णपणे नष्ट झाले..या पुरात केवळ पिकेच नव्हे तर जमीनवरील सुपीक मातीही वाहून गेली. अनेक ठिकाणी नदीचे पात्र बदलले, शेतांमध्ये मोठे खड्डे पडले आणि जमिनी शेतीयोग्य राहिल्या नाहीत. रब्बी हंगामासाठी जमीन कशी तयार करावी, असा गंभीर प्रश्न शेतकऱ्यांसमोर उभा राहिला होता..Ativrushti Madat: खरडून गेलेल्या जमिनीसाठी ९० कोटी ८६ लाख रुपयांचा निधी मंजूर; शासन निर्णय जारी.ही परिस्थिती लक्षात घेऊन शेतकऱ्यांना दिलासा देण्यासाठी सरकारने खरडून गेलेल्या जमिनीसाठी हेक्टरी ४७ हजार रुपयांचे अनुदान जाहीर केले. मात्र, ही मदत केवळ दोन हेक्टरपर्यंतच देण्याचा निकष ठेवण्यात आला. यात अतिवृष्टीमुळे झालेल्या पीक नुकसानीत ग्रामस्तरीय समितीने खरडून गेलेल्या जमिनींचे दोन हेक्टरपर्यंतचे सर्व क्षेत्र नोंदविल्याने बहुतांश शेतकऱ्यांना पीक नुकसानीपोटी अनुदान मिळाले..या व दोन हेक्टरपेक्षा जास्त क्षेत्र असलेल्या शेतकऱ्यांना खरडून गेलेल्या जमिनीचे स्वतंत्र अनुदान मिळण्यात अडचणी येत आहेत. एका शेतकऱ्याला एकाच हंगामात दोन हेक्टरच्या आत एकच लाभ देता येईल, या शासन निर्णय आहे..यामुळे पीक नुकसान व जमीन खरडणी असा अनुदानाचा दुहेरी लाभ एकत्रितपणे दोन हेक्टरच्या पुढे जात असल्याने नदीकाठचे व अन्य काही ठिकाणचे शेतकरी अनुदानापासून वंचित आहेत. सरकारकडून यात काही मार्ग निघेल, अशी शेतकऱ्यांची अपेक्षा असून त्यासाठी शेतकरी तहसील व कृषी कार्यालयातील अधिकारी व कर्मचाऱ्यांकडे सातत्याने विचारणा करत आहेत..ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
