Maharashtra drought: ‘‘कर्ज काढून, हातउसनं करून सोयाबीन पेरलं, मल्चिंगवर मिरची बी लावली, मका पेरला. मह्या पोराचा शेतीवर लय जीव, पण पेरलेल्या पिकातलं हातात काही आलं नाही, उलट दुष्काळानं माझा लेक नेला! जिथं सोयाबीन हुतं, तिथंच लेकाला अग्नी दिला. आता त्याची राख उडती आन त्ये बगून काळीज फाटत जातं हो...’’.आत्महत्या केलेल्या एका तरुण शेतकऱ्याच्या आईने व्यक्त केलेली ही भावना काळीज पिळवटून टाकणारी आहे. ‘सकाळ’ने प्रत्यक्ष बांधावर जाऊन केलेल्या पाहणीत दुष्काळाची दाहकता किती खोलवर गेली आहे, याचे भयाण वास्तव दिसून आले. विजय गोविंदराव बचाटे (वय ३६, रा. मुरूमखेडा, ता. जि. छत्रपती संभाजीनगर) यांनी २८ सप्टेंबरच्या सायंकाळी विषारी औषध पिऊन जीवन संपवले. त्यांच्या घरी, शेतात जाऊन शिवार बघितले, तेव्हा त्यांची आई जिजाबाई यांनी अश्रूंना वाट करून देत शेतकऱ्यांची प्रातिनिधिक व्यथाच मांडली..Women Farmer Empowerment: शेतीत राबणाऱ्या शक्तीला मिळणार स्वतंत्र ओळख.लेकाला अग्नी दिल्याची राख उडते...घरापासून अवघ्या १००-२०० मीटर अंतरावर मृत विजय यांना अग्नी देण्यात आला. ‘‘उन्हाळ्यासारख्या रखरखत्या उन्हात वारा सुटला की राख उडून अंगणापर्यंत येती, तवा माझं काळीज फाटून जातं,’’ अशी भावना जिजाबाईंनी व्यक्त केली. विशेष म्हणजे, ज्या शेतात विजय यांना अग्नी दिला होता, त्याच शेतात सोयाबीन पेरणी केली होती. त्यात काहीच आलं नाही, म्हणून सोयाबीन काढून टाकलं. बाजूलाच पाण्याअभावी सुकलेला मका आहे. त्याच्याच दुसऱ्या बांधालगत मल्चिंग अंथरून महागडी औषधं, खत वापरून मिरची लावली होती. आता विहिरीला पाणी नाही. त्यामुळे फुलोऱ्यातल्या मिरचीने माना टाकल्या हायंत, असंही त्यांनी सांगितले..कर्जाचा डोंगर, बॅंकेचा तगादाजिजाबाईंनी सांगितले, की एका मल्टिस्टेटचं पाच लाखांचं कर्ज विजयच्या नावावर होतं. त्याचा बोजा सातबाऱ्यावर होता. बॅंकेच्या नोटिसा लेकाला येत होत्या, हातउसन्या पैशांचं देणं होतं.ट्रॅक्टरचाही हप्ता होता. नापिकी आणि कर्जबाजारीपणा या विवंचनेतून विजयनं २८ सप्टेंबरच्या सायंकाळी विषारी औषध पिऊन जीवन संपवलं..Goat Farming Business: भूमिहीन, अल्पभूधारक? नव्हे, या तर शेळीपालनातील उद्योजिका .पोरकं झालेल्या लेकरांना शब्दही फुटेनाविजय बचाटे यांचा विठ्ठल हा मुलगा आठवीत, तर मुलगी लक्ष्मी सातवीत शिकते. ‘वडील मला शेवटचं म्हटले, की मला येकदा पाणी दी... इतकंच आमचं शेवटचं बोलणं झालं.’ मुलगी लक्ष्मी वडील गेल्याच्या धक्क्यातून अजून सावरलेली नव्हती, त्यामुळे एकही शब्द तिला बोलता आला नाही..आमाला दोन एकर रान हायं. चार-पाच दिवसापस्नं पती विजय तणावातच व्हते, पण काही बोलत नव्हते. कर्ज काढून आमी गावड्या (गायी) घ्यातल्या व्हत्या. त्यातल्या कै गावड्याला आजार झाल्ता म्हणून त्या मेल्या, लोकांचं देणं बी व्हतं, ऱ्हायल्याला गावड्या बी इकून टाकल्या. हिरीला पाणी नाही. रानात एक बी पीक हातात आलं नै. औषाद पिऊन घरात यिऊन मला म्हणले, कर्ज लै झालंय, आता मी ऱ्हात नाही. गावातल्या लोकांकडनं पाच लाख रुपयांपर्यंत कर्ज घेतलं होतं आणि मल्टिस्टेटकडनं पाच लाख असं दहा लाख कर्ज होतं. मालकानी औषाद पिऊन जीव दिला आमी लेकरासकट रस्त्यावर आलूया.- कासाबाई बचाटे, मृत विजय यांच्या पत्नी.मृत बचाटे यांचे मुरुमखेडा शिवारातील गट ४०५ मध्ये ०.८४ इतके क्षेत्र आहे. या घटनेचा सविस्तर पंचनामा, अहवालासह इतर माहिती एकत्रित जिल्हाधिकारी कार्यालयाला सादर करण्यात येणार आहे. त्यानंतर प्रत्यक्ष आर्थिक मदत मिळेल. ही प्रक्रिया तत्काळ करीत आहोत. शेतकऱ्यांनी खचून जाऊन असे टोकाचे पाऊल उचलू नये.- रीना राठोड, तलाठी, दुधड सजा.ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
