Drought Crisis: यंदा पावसातील खंड आणि अपुऱ्या पावसामुळे खरीप पिकांना फटका बसला असतानाच, उपलब्ध पाण्यावर सिंचन करून पिके वाचविण्यासाठी शेतकऱ्यांची धडपड सुरू आहे. मात्र, अनेक भागांत वीजपुरवठा आणि रोहित्रांच्या समस्यांमुळे सिंचनात अडथळे येत आहेत. कमी क्षमतेच्या रोहित्रांवर एकाच वेळी कृषिपंपांचा भार आल्यास फ्यूज उडणे, रोहित्र जळणे तसेच नादुरुस्त रोहित्र वेळेत उपलब्ध न होणे, अशा समस्यांना शेतकऱ्यांना सामोरे जावे लागत आहे..अकोला जिल्ह्यात काही ठिकाणी सौरऊर्जेच्या माध्यमातून कृषिपंपांना वीजपुरवठा होत असल्याने सिंचनासाठी काही प्रमाणात दिलासा मिळत आहे. मात्र, पारंपरिक वीजपुरवठ्याशी संबंधित समस्या कायम आहेत. तीन दिवसांपूर्वी कृषिमंत्री दत्तात्रय भरणे यांच्या उपस्थितीत झालेल्या आढावा बैठकीत अकोला, वाशीम आणि बुलडाणा जिल्ह्यांतील लोकप्रतिनिधींनी रोहित्र आणि वीजपुरवठ्याच्या प्रश्नांकडे लक्ष वेधले. राज्याचे कामगार मंत्री आकाश फुंडकर यांनीही रोहित्रांच्या प्रश्नाकडे महावितरणचे अधिकारी गांभीर्याने लक्ष देत नसल्याची तक्रार केली..Maharashtra Drought Crisis: दुष्काळ जाहीर करण्यात अटी-शर्ती नकोत.बुलडाणा जिल्ह्यातही वीजपुरवठ्याचा प्रश्न कायम असल्याचे शेतकऱ्यांचे म्हणणे आहे. दिवसा उपलब्ध होणाऱ्या वीजपुरवठ्याच्या वेळेनुसार सिंचनाचे नियोजन करावे लागत आहे. मेहकर तालुक्यातील घुटी येथील शेतकरी महादेव पाटील यांनी सांगितले की, त्यांच्या शिवारासाठी आठ तासांचा वीजपुरवठा निश्चित आहे. प्रत्यक्षात मात्र पाच ते सहा तासच वीज मिळते..मेहकर तालुक्यातील भोसा येथील प्रभाकर खुरद यांनी सांगितले की, गेल्या पाच वर्षांपासून शेतकऱ्यांना २४ तास वीजपुरवठ्याचे आश्वासन दिले जात आहे. मात्र, त्यांच्या गावात सुमारे सहा तास वीजपुरवठा होतो. त्यातील सुमारे दोन तास देखभाल-दुरुस्तीत जात असल्याने प्रत्यक्षात चार तासच वीज मिळते. भोसा परिसरातील २५ शेतकऱ्यांनी धरणावरून एक ते दोन किलोमीटर पाइपलाइन केली आहे. मात्र, या शेतकऱ्यांना वीजजोडणी देण्याचे काम थांबले असून, ते जोडणीच्या प्रतीक्षेत असल्याचे खुरद यांनी सांगितले..Agriculture Electricity Issue: राज्यात विजेचाही ‘दुष्काळ’ .आमसरी येथील नितीन खर्चे यांनी त्यांच्या परिसरातील वीजतार चोरीच्या समस्येकडे लक्ष वेधले. गेल्या तीन वर्षांपासून वारंवार तार चोरीच्या घटना घडत असून, महावितरणकडे अर्ज आणि पोलिसांकडे तक्रारी करूनही हा प्रकार थांबलेला नसल्याचे त्यांनी सांगितले. चोरी झालेल्या तारांच्या जागी नवीन तार बसविण्यासाठी शेतकऱ्यांनी स्वखर्च करावा किंवा वरिष्ठांकडून साहित्य उपलब्ध झाल्यानंतर तार बसविण्यात येईल, अशी उत्तरे मिळत असल्याचे खर्चे यांनी सांगितले..दुष्काळी परिस्थितीत उपलब्ध पाण्यावर पिके वाचविण्यासाठी शेतकरी सिंचनाचा प्रयत्न करीत आहेत. त्यामुळे वीजपुरवठा, रोहित्रांची उपलब्धता आणि प्रलंबित वीजजोडण्यांचे प्रश्न तातडीने सोडवावेत, अशी मागणी शेतकऱ्यांकडून होत आहे..रोहित्रांवरील वाढता भार; शेतकऱ्यांची कोंडीकमी क्षमतेच्या रोहित्रांवर एकाच वेळी अनेक कृषिपंप सुरू झाल्याने फ्यूज उडणे आणि रोहित्र जळण्याचे प्रकार वाढत आहेत. नादुरुस्त रोहित्र वेळेत उपलब्ध न झाल्यास सिंचन पूर्णपणे ठप्प होते. दुष्काळी परिस्थितीत उपलब्ध पाण्यावर पिके वाचविण्यासाठी वीज अत्यावश्यक असल्याने रोहित्रांची उपलब्धता आणि देखभाल व्यवस्था सक्षम करण्याची गरज आहे..ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
