milk rate : पशुसंवर्धन मंत्री विखेंच्या आश्वासनानंतर दूध उत्पादकांचं उपोषण मागे!

विविध मागण्यांसाठी दूध उत्पादकांचे सुरू असलेले अन्न त्याग उपोषण ६ व्या दिवशी स्थगित करण्यात आले. पशुसंवर्धन मंत्री राधाकृष्ण विखे पाटील यांनी किसान सभेचे नेते डॉ. अजित नवले यांच्याशी फोन चर्चा केली.

तसेच दूध दर प्रश्नावर मंत्रिमंडळ बैठकीत चर्चा करू आणि हिवाळी अधिवेशनापूर्वी शेतकरी प्रतिनिधी सोबत बैठक घेऊ अशी आश्वासन डॉ. नवले यांना दिले.

तसेच जनसंघर्ष संघटनेचे उपोषणकर्ते संदीप दराडे आणि अंकुश शेटे यांना जिल्हाधिकाऱ्याने दूध दर प्रश्नावर बैठक घेतली जाईल, असे लेखी पत्र दिले. त्यामुळे उपोषणकर्त्यांनी ६ व्या दिवशी जिल्हाधिकाऱ्यांच्या हस्ते लिंबू सरबत घेऊन उपोषण स्थगित केले आहे.  

दुधाला दर ३४ रुपये प्रतिलीटरचा दर मिळावा यासह विविध मागण्यांसाठी किसान सभा आणि जनसंघर्ष संघटनेकडून अहमदनगर जिल्ह्यातील अकोले येथे अन्नत्याग उपोषण सुरू होते.

तसेच किसान सभेचे राष्ट्रीय अध्यक्ष डॉ. अशोक ढवळे यांनी दूध प्रश्नावर पशुसंवर्धन मंत्र्यांशी चर्चा केली होती. त्यामुळे सर्वांच्या सुचनांचा आदर करून उपोषण स्थगित करण्याचा निर्णय घेतल्याचे डॉ. नवले यांनी सांगितले. 

या उपोषणाच्या पार्श्वभूमीवर शरद पवार यांनी पत्रकार परिषद घेऊन दूध दराकडे सरकारचे लक्ष वेधले होते. तसेच डॉ. नवले आणि उपोषणकर्त्यांनी तब्येतीसाठी उपोषण मागे घेण्याचे आवाहन केले होते.

यावेळी सरकारने दुध पावडर निर्यातीला प्रोत्साहन द्यावे अशीही मागणीही किसान सभेने केली आहे. दूध पावडरचा साठा वाढत आहे. आंतराष्ट्रीय बाजारात दुध पावडरचे दर कोसळल्याने निर्यात बंद झाली आहे. दूध दर कोसळण्याचे हे एक महत्वाचे कारण सांगितले जात आहे. याकडे सरकारचे लक्ष किसान सभेने वेधले आहे.