अकोला  ः ७ जानेवारीला होऊ घातलेल्या जिल्हा परिषद व पंचायत समिती निवडणुकीसाठी उमेदवारी दाखल करण्याच्या शेवटच्या दिवशी उमेदवारांची एकच गर्दी उसळली होती. अकोला जिल्हा परिषदेच्या ५३ गटांमध्ये विविध राजकीय पक्ष, अपक्ष उमेदवार मिळून ५४० उमेदवारांनी ५८२ उमेदवारी अर्ज दाखल केले. तर पंचायत समितींच्या १०६ गणांतून निवडणूक लढण्यास इच्छुक असलेल्या ७२१ उमेदवारांचे ७४८ उमेदवारी अर्ज दाखल झाले. जिल्हा परिषदेसह पंचायत समितींच्या निवडणुकीसाठी १९ नोव्हेंबरपासून कार्यक्रम लागू झाला आहे. या निवडणुकीसाठी सोमवार (ता. २३) हा उमेदवारी दाखल करण्याचा शेवटचा दिवस होता. यानुसार शेवटच्या दिवसापर्यंत तेल्हारा तालुक्यातील जिल्हा परिषदेच्या गटांसाठी ७५ उमेदवारांनी ७९ अर्ज दाखल केले. तर पंचायत समितीच्या गणांसाठी १०८ उमेदवारांचे तितकेच अर्ज आले. अकोट तालुक्यात जिल्हा परिषदेच्या गटांसाठी १०० उमेदवारांनी १०७ तर पंचायत समितीच्या गणांसाठी ११४ उमेदवारांचे ११९ अर्ज, मूर्तिजापूरमध्ये गटांमध्ये ५६ उमेदवारांनी ६३ तर पंचायत समितीच्या गणांसाठी ९५ उमेदवारांनी १०१ अर्ज, अकोला तालुक्यात गटांसाठी ११० उमेदवारांनी ११५ तर पंचायत समितीच्या गणांसाठी १२६ उमेदवारांनी १२७ अर्ज, बाळापूरमध्ये गटांसाठी ७२ उमेदवारांनी ८१ तर पंचायत समितीच्या गणांसाठी ९९ उमेदवारांनी १०३ अर्ज दाखल केले. बार्शिटाकळी तालुक्यात जिल्हा परिषदच्या गटांसाठी ६९ उमेदवारांनी ७५ तर पंचायत समितीच्या गणांसाठी १०४ उमेदवारांनी १०७ अर्ज दाखल केले आणि पातूर तालुक्यात जिल्हा परिषदेच्या गटांसाठी ५८ उमेदवारांनी ६२ तर पंचायत समितीच्या गणांसाठी ७५ उमेदवारांनी ८३ अर्ज दाखल केले आहेत. दाखल अर्जांपैकी किती जण रिंगणात राहतात हे एक जानेवारीनंतर स्पष्ट होईल. एक जानेवारीला उमेदवारी मागे घेण्याची अंतिम मुदत आहे. राजकीय पक्षांनी कापले विद्यमानांचे पत्ते  या निवडणुकीत राजकीय पक्षांनी नवीन चेहऱ्यांना संधी दिली आहे. गेल्यावेळी निवडणुकीच्या रिंगणात असलेल्या बहुतांश उमेदवारांना उमेदवारी नाकारण्याचे काम पक्षांनी केले. शिवाय स्थानिक पातळीवर वलय असलेल्यांना उमेदवारी दिली आहे. यामुळे बंडखोरीची शक्यता वाढली आहे. काही दिग्गज पक्षाने उमेदवारी नाकाराल्याने अपक्ष म्हणून निवडणूक रिंगणात उतरू शकतात.  अकोला जिल्ह्यातील तालुकानिहाय गट व गण