Pune News : राज्यातील थंडी आज काहीशी वाढलेली दिसते. उत्तर भारतातही थंडीत चढ उतार कायम आहेत. राज्यात किमान तापमानात घट झाल्याने गारठा वाढला. मात्र आजपासून कोकण, मध्य महाराष्ट्र आणि मराठवाड्यातील काही भागात अंशतः ढगाळ हवामान होण्याचा अंदाज आहे. त्यामुळे थंडीही काहीप्रमाणात कमी होण्याची शक्यता आहे, असा अंदाज हवामान विभागाने दिला.

उत्तर भारतात थंडीचे प्रमाण कमी अधिक होताना दिसत आहे. राजस्थान आणि परिसरावर चक्राकार वाऱ्यांची स्थिती आहे. वायव्य भारतात १४० नॉट्स वेगाने पश्चिमेकडील जोरदार वाऱ्यांचे झोत कायम आहेत.

पश्चिमी चक्रवातांच्या तीव्रतेनुसार थंडी सातत्याने कमी-अधिक होत आहे. आज मध्य प्रदेशच्या मंडला येथे देशाच्या सपाट भूभागावरील नीचांकी ६.५ अंश सेल्सिअस तापमानाची नोंद झाली. उत्तर भारतातील तापमानात चढ उतार राहून थंडीही कमी अधिक होण्याची शक्यता आहे, असा अंदाज हवामान विभागाने दिला.

तर राज्यातही थंडी स्थिर दिसत नाही. किमान तापमानात चढ उतार कायम आहेत. राज्यात तीन दिवस गारठा काहीसा वाढला होता. उत्तर महाराष्ट्र आणि मराठवड्यात काही ठिकाणी तापमान १० अंशाच्या खाली आले आहे. आज धुळे येथील कृषी महाविद्यालयात राज्यातील निचांकी ८.६ अंश सेल्सिअस तापमानाची नोंद झाली होती. तर निफाड येथील गहू संशोधन केंद्रात ९.५ अंश सेल्सिअस तापमान होते.

राज्यात अनेक भागात तापमानात चढउ उतार सुरुच आहेत. तर सकाळी धुक्याची चादरही पाहायला मिळत आहे. आजपासून कोकण, मध्य महाराष्ट्र आणि मराठवाड्यातील काही भागात अंशतः ढगाळ हवामान होण्याचा अंदाज आहे. त्यामुळे थंडीही काहीप्रमाणात कमी होण्याची शक्यता हवामान विभागाने वर्तविली आहे.