Pune News : राज्यात ढगाळ आकाशासह पावसाला पोषक हवामान झाले आहे. अनेक ठिकाणी किमान तापमान १७ अंशाच्या पुढे गेल्याने थंडी गायब झाली. राज्यातील तापमानातील वाढ आणखी काही दिवस कायम राहील. पुढील ४ दिवस राज्यातील काही भागात विजांसह पावसाची शक्यता हवामान विभागाने वर्तविली.

हवामान विभागाने आज सिंधुदूर्ग, रत्नागिरी, कोल्हापूर, सातारा, पुणे, सांगली, धाराशिव, लातूर आणि नांदेड जिल्ह्यात काही ठिकाणी विजांसह हलक्या पावसाचा अंदाज आहे. उद्या सिंधुदूर्ग आणि कोल्हापूर जिल्ह्यात काही ठिकाणी विजांसह हलक्या पावसाचा येलो अलर्ट देण्यात आला. तर रत्नागिरी, सातारा, पुणे, सांगली, सोलापूर, धाराशिव, बीड, लातूर आणि नांदेड जिल्ह्यात काही भागात हलक्या पावसाचा अंदाज आहे. 

गुरुवारी सिंधुदूर्ग, रत्नागिरी, कोल्हापूर, सातारा, सांगली, पुणे, सोलापूर, धाराशिव आणि लातूर जिल्ह्यात काही ठिकाणी विजांसह हलक्या पावसाचा येलो अलर्ट हवामान विभागाने दिला. तर रायगड, नगर, बीड, परभणी आणि नांदेड जिल्ह्यात काही ठिकाणी विजांसह हलक्या पावसाची शक्यताही हवामान विभागाने वर्तविली. 

शुक्रवारी कोल्हापूर, सांगली आणि सातारा जिल्ह्यात काही ठिकाणी विजांसह हलक्या पावसाचा येलो अलर्ट हवामान विभागाने दिला. तर सिंधुदूर्ग, रत्नागिरी, रायगड, पुणे आणि सोलापूर जिल्ह्यात काही ठिकाणी हलक्या ते मध्यम पावसाचा अंदाज हवामान विभागाने दिला. तर राज्यात पुढील ५ दिवस थंडी कमीच राहील, असाही अंदाज हवामान विभागाने दिला.