Pune News : राज्यात आतापासूनच उन्हाचा चटका तापदायक ठरत आहे. सकाळी काहीशी थंडी जाणवत असली तरी उन्हाचा चटका मात्र वाढला. आज सोलापूर येथे उच्चांकी ३६ अंश तापमानाची नोंद झाली आहे. तर अनेक ठिकाणी तापमान ३४ अंशाच्या पुढे होते. राज्यातील कमाल आणि किमान तापमानातील चढ-उतार कायम राहतील, असा अंदाज हवामान विभागाने दिला.

उत्तर भारतातील राज्यांमध्येही तापमानात चढ उतार सुरु आहेत. राजस्थान आणि परिसरावर चक्राकार वारे वाहत आहे. तर वायव्य भारतात १२.६ किलोमीटर उंचीपर्यंत ११० नॉट्स वेगाने पश्‍चिमेकडील जोरदार वाऱ्यांचे प्रवाह कायम आहेत.

याचा परिणाम थंडीवर दिसून येत आहे. आज राजस्थानमधील संगारिया येथे देशाच्या सपाट भूभागावरील नीचांकी ६.५ अंश सेल्सिअस तापमानाची नोंद झाली. तर कर्नाटकतील कलबुर्गी येथे देशातील उचांकी ३६.६ अंश सेल्सिअस तापमानाची नोंद झाली होती.

राज्यात फेब्रुवारी महिन्यातच उन्हाची ताप वाढली आहे. ऐन हिवाळ्यात उन्हाळ्याचा अनुभव येत आहे. दुपारी राज्यातील बहुतांशी भागात उन्हाचा चटका वाढलेला आहे.

आजही सोलापूर येथे सर्वाधिक ३६ अंश सेल्सिअस तापमानाची नोंद झाली होती. तर राज्यातील बहुतांशी ठिकाणी तापमान ३४ अंंशाच्या पुढे गेले होते. राज्यातील तापमानात चढ उतार कायम राहू शकतात, असा अंदाज हवामान विभागाने दिला.