Pune News : कोकणात उन्हाचा ताप वाढल्याने चांगलाच घामटा निघत आहे. यातच राज्याच्या विविध भागांत वादळी पावसाने तडाखा दिला आहे. ढगाळ हवामानामुळे कमाल तापमानात चढ-उतार होत आहेत. आज (ता. २५) कोकणात उष्ण व दमट हवामानाचा, तर मध्य महाराष्ट्र, मराठवाडा, विदर्भात वादळी वारे, विजांसह पावसाचा इशारा (येलो अलर्ट) हवामान विभागाने दिला आहे.

मध्य महाराष्ट्र आणि परिसरावर चक्राकार वाऱ्याची स्थिती आहे. मध्य महाराष्ट्र, मराठवाड्यात ढगाळ हवामान होत असून, मंगळवारी (ता. २३) नांदेड, परभणी, जालना, अमरावती, वर्धा जिल्ह्यांत वादळी पावसाने तडाखा दिला. आज (ता. २५) मध्य महाराष्ट्र, मराठवाडा, विदर्भात वादळी वारे, विजांसह पावसाचा इशारा (येलो अलर्ट) देण्यात आला आहे.

बुधवारी (ता. २४) सकाळपर्यंतच्या २४ तासांमध्ये मालेगाव येथे राज्यातील उच्चांकी ४१.८ अंश सेल्सिअस तापमानाची नोंद झाली. कमाल तापमानात चढ-उतार होत असून, धुळे, जळगाव, ब्रह्मपुरी येथे तापमान ४० अंशांवर आहे. आज (ता. २५) कोकणात उष्ण व दमट हवामानाचा, तर उर्वरित राज्यात ढगाळ हवामानासह उन्हाचा चटका, उकाडा कायम राहण्याचा अंदाज आहे.

बुधवारी (ता. २४) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअसमध्ये) : पुणे ३९.६, धुळे ४१, जळगाव ४०.८, महाबळेश्वर ३२.४, मालेगाव ४१.८, नाशिक ३८.२, निफाड ३८.१, सांगली ३८.२, सातारा ३८.४, सोलापूर ३९.८, सांताक्रूझ ३४.२, डहाणू ३४.५, रत्नागिरी ३४.६, छत्रपती संभाजीनगर ३८.२, बीड ३७.९, धाराशिव ३८.९, परभणी ३९.१, अकोला ३९.२, अमरावती ३७.८, बुलडाणा ३७.६, ब्रह्मपुरी ४०.८, चंद्रपूर ३९, गडचिरोली ३६.६, गोंदिया ३६, नागपूर ३७.८, वर्धा ३९, वाशीम ३८.६, यवतमाळ ३८.५.

४० अंशांपेक्षा अधिक कमाल तापमान असलेली ठिकाणे : मालेगाव ४१.८, धुळे ४१, जळगाव ४०.८, ब्रह्मपुरी ४०.८.

उष्ण व दमट हवामानाचा इशारा (येलो अलर्ट) : पालघर, ठाणे, मुंबई, रायगड, रत्नागिरी, सिंधुदुर्ग.

वादळी पावसाचा इशारा (येलो अलर्ट) : जळगाव, नगर, पुणे, छत्रपती संभाजीनगर, बीड, जालना, वाशीम, यवतमाळ, वर्धा, चंद्रपूर, गडचिरोली.