Pune News : पावसाला पोषक हवामान, ढगाळ आकाशामुळे राज्यातील थंडी कमी झाली आहे. कोकण आणि मध्य महाराष्ट्राच्या काही भागांत शुक्रवारी (ता. १०) दुपारनंतर पावसाने हजेरी लावली.

आज (ता. १२) राज्यात ढगाळ हवामानासह तापमानात चढ-उतार होण्याची शक्यता आहे. राज्यात मुख्यतः कोरड्या हवामानाचा अंदाज आहे. राज्यात गारठा कमी झाला असून, गुलाबी थंडीची प्रतीक्षा आहे.

पश्चिम - मध्य अरबी समुद्रात चक्राकार वाऱ्यांची स्थिती कायम आहे. बंगालच्या उपसागरात मंगळवारपर्यंत (ता. १४) कमी दाबाचे क्षेत्र तयार होण्याचे संकेत आहेत. पश्चिमेकडे सरकताना या प्रणालीची तीव्रता वाढेल.

ढगाळ आकाशामुळे राज्याच्या तापमानात चढ-उतार सुरू आहे. उकाडा कायम आहे. शुक्रवारी (ता. १०) दुपारनंतर कोकण, मध्य महाराष्ट्रात हलक्या ते जोरदार पावसाने हजेरी लावली. शनिवारी (ता. ११) राज्यातील ढगाळ हवामान निवळून आकाश निरभ्र झाले आहे.

यवतमाळ येथे नीचांकी १६.५ अंश तापमान

शनिवारी (ता. ११) सकाळपर्यंतच्या २४ तासांमध्ये सांताक्रुझ येथे उच्चांकी ३५.७ अंश सेल्सिअस, उर्वरित राज्यात कमाल तापमान ३० ते ३६ अंशाच्या दरम्यान आहे. किमान तापमानात चढ-उतार होत असून, पारा १६ अंशांच्या पुढे आहे. शनिवारी (ता. ११) यवतमाळ येथे राज्यातील नीचांकी १६.५ अंश सेल्सिअस तापमानाची नोंद झाली.

शनिवारी (ता. ११) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३०.८ (१९.२), जळगाव ३५.२ (१७.२), कोल्हापूर २८.७ (२२.६), महाबळेश्वर २४.६ (१७.५), नाशिक ३२.५ (१९.४), निफाड ३२.६ (१८.०), सांगली २८.५ (२२.५), सातारा २९.३ (२१.४), सोलापूर ३२.५ (२२.४), सांताक्रूझ ३५.७ (२४.८), डहाणू ३४.० (२३.६), रत्नागिरी ३३.२ (२५.४),

छत्रपती संभाजीनगर ३२.६ (१७.०), नांदेड ३२.६ (२१.०), परभणी ३०.० (१९.४), अकोला ३५.४ (१९.४), अमरावती ३३.८ (१८.५), बुलडाणा ३४.० (१९.३), ब्रह्मपुरी ३३.३(१९.६), चंद्रपूर ३१.४(१७.४), गडचिरोली ३२.० (१६.६), गोंदिया ३३.० (१६.८), नागपूर ३३.०(१७.८), वर्धा ३२.९(१८.५), वाशीम ३३.६(१८.६) यवतमाळ ३४.५ (१६.५).