Pune News: थंडीचा हंगाम शेवटच्या टप्प्यात आला असून राज्यात उन्हाचा चटका वाढू लागला आहे. राज्यात काही ठिकाणी कमाल तापमानाचा पारा ३६ अंशावर पोहचला आहे. तर किमान तापमान १६ अंशांवर पोहचलं आहे. त्यामुळे दुपारी उन्हाचा चटका तीव्र झाला आहे. तसेच घामटा निघत आहे.

राज्यात पुढील पाच दिवस कोरड्या हवामानासह कमाल आणि किमान तापमान कायम राहण्याची शक्यता आहे. तर उत्तर मध्य महाराष्ट्र आणि दक्षिण मध्य महाराष्ट्र आणि मराठवाड्यात तापमान सरासरीपेक्षा वर राहण्याचा अंदाज हवामानशास्त्र विभागाने वर्तवला आहे.

विदर्भात कमाल तापमानात वाढ झाली आहे. त्यामुळे उन्हाच्या झळा अधिक तीव्र झाल्या आहेत. विदर्भातील ब्रम्हपुरी येथे राज्यातील उच्चांकी ३७.२ अंश सेल्सियस तापमानाची नोंद झाली. तर नाशिक येथे १४.७ अंश सेल्सियस किमान तापमानाची नोंद झाली. विदर्भात उन्हाचा चटका वाढल्याने पिकांची काळजी घेण्याचा सल्ला कृषी हवामान केंद्राकडून देण्यात आला आहे. 

उत्तर पाकिस्तान आणि जम्मू काश्मीरच्या लगतच्या भागात पश्चिमी चक्रावाताची निर्मिती झाली आहे. तसेच आसाम आणि लगतच्या प्रदेशात कमी दाब क्षेत्र निर्माण झाले आहे. त्यामुळे अरुणाचल आणि ईशान्य आसाममध्ये पावसाची शक्यता आहे. मागील चोवीस तासात राजस्थान येथील सिकार येथे देशाच्या सपाट भुभागावरील निच्चांकी ३.५ अंश सेल्सियस तापमानाची नोंद झाली. 

राज्यातील बहुतांश भागात पुढील ४ ते ५ दिवस कमाल तापमानात २ ते ३ अंशाने वाढ होण्याची शक्यता आहे. तर उत्तर महाराष्ट्रातील किमान तापमानात पुढील २४ तासांनंतर २ ते ३ अंशाने वाढ होण्याची शक्यता हवामानशास्त्र विभागाने वर्तवली आहे.

निरभ्र आकाश आणि  स्वच्छ सूर्य प्रकाशामुळे पुढील २४ तासात राज्यातील बहुतांश भागात कमाल तापमान ३४ अंश तर किमान तापमान १९ अंशांवर राहील. तर पुढील दोन दिवसांत बहुतांश भागात कमाल तापमान ३६ आणि किमान तापमान २१ अंशावर पोहचण्याचा अंदाज हवामानशास्त्र विभागाने वर्तवला आहे.