IMD Report : उत्तर महाराष्ट्रात थंडी कायम आहे, तर विदर्भासह राज्यात किमान तापमानाचा पारा खाली येऊ लागला आहे. राज्याच्या कमाल तापमानातही घट होत आहे. आज (ता. १९) राज्यात मुख्यतः कोरड्या हवामानासह तापमानात वाढ-घट कायम राहण्याची शक्यता हवामान विभागाने वर्तविली आहे.

बंगालच्या उपसागरात ‘मिधिली’ चक्रीवादळ बांगलादेशच्या खेपुपराजवळ जमिनीवर आले. हे चक्रीवादळ निवळले असून, उत्तर त्रिपुरा आणि परिसरावर कमी दाबाचे क्षेत्र सक्रिय आहे. श्रीलंकेजवळ चक्राकार वाऱ्यांची स्थिती कायम आहे. त्यापासून बंगालच्या उपसागरातील चक्रीवादळापर्यंत हवेचा कमी दाबाचा पट्टा सक्रिय आहे. दक्षिण अंदमान समुद्रात ५.८ किलोमीटर उंचीवर चक्राकार वाऱ्यांची स्थिती आहे.

राज्यात कमाल तापमानाचा पारा खाली आला आहे. शनिवारी (ता. १८) सकाळपर्यंतच्या २४ तासांमध्ये रत्नागिरी येथे राज्यातील उच्चांकी ३४.९ अंश सेल्सिअस तापमान नोंदले गेले. उर्वरित राज्यात कमाल तापमानाचा पारा २९ ते ३५ अंशाच्या दरम्यान आहे.

निफाड येथे नीचांकी १२.४ अंश

किमान तापमानाचा पारा कमी-अधिक होत आहे. निफाड येथील गहू संशोधन केंद्रात राज्यातील नीचांकी १२.४ अंश सेल्सिअस तापमानाची नोंद झाली. नाशिक, पुणे, जळगाव, गोंदिया, वाशीम येथे किमान तापमान १५ अंशाच्या खाली आहे. राज्याच्या किमान तापमानात चढ-उतार होण्याचा अंदाज आहे.

शनिवारी (ता. १८) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३०.३ (१४.९), जळगाव ३१.६ (१४.९), कोल्हापूर ३०.२ (१९.५), महाबळेश्वर २६.८ (१५.९), नाशिक ३०.० (१४.२), निफाड २९.१ (१२.४), सांगली ३०.८ (१८.९), सातारा ३१.० (१६.०), सोलापूर ३३.६(१९.६), सांताक्रूझ ३४.८ (२२.४), डहाणू ३३.३ (२१.०), रत्नागिरी ३४.९ (२२.०), छत्रपती संभाजीनगर ३१.२ (१६.०), नांदेड ३१.४ (१८.६), परभणी ३१.० (१८.०), अकोला ३२.६ (१७.१), अमरावती ३१.६ (१७.४), बुलडाणा ३०.२ (१६.४), ब्रह्मपुरी ३३.७ (१७.६), चंद्रपूर ३१.२(१६.०), गडचिरोली ३०.६ (१५.६), गोंदिया ३०.५ (१४.८), नागपूर ३०.८(१५.१), वर्धा ३०.९(१६.९), वाशीम ३५.२(१६.०), यवतमाळ ३२.५ (१६.०).